Madaxweyne Cirro oo qaabilay safiirka Turkiga ee Soomaaliya

Hargeysa (QJ) – Madaxweynaha Somaliland H.E. Cabdiraxmaan Maxamed Cabdillaahi (Cirro) ayaa maanta kulan muhiim ah qasriga madaxtooyada kula yeeshay Safiirka dawladda Turkiga u fadhiya Soomaaliya Alper Aktaş iyo weftigii uu hoggaaminayey. Qodobada ay ka wadahadleen ayaa ahaa sidii loo xoojin lahaa wada shaqaynta Somaliland iyo Turkiga.

Safiirka Turkiga waxa uu Madaxweyne Cirro ku hambalyeeyey guusha uu ka soo hooyey doorashada, waxana uu qiray biseylka dimuqraadiga ah ee Somaliland iyo habsami u wareejinta talada dalka. Waxa uu aad u bogaadiyay sida nabada ah ee ay Somaliland hogaanka ugu wareejisay, isaga oo ku tilmaamay guul naadir ah oo ka dhacda Geeska Afrika. Waxa kale oo uu ku bogaadiyay sida ay shacabka Somaliland u adkaysteen.

Kulanka ayaa diiradda lagu saaray arrimo muhiim ah oo ay ka mid yihiin nabadeynta, iskaashiga dhaqaalaha, ganacsiga iyo maalgashiga, waxbarashada, caafimaadka, horumarinta kaabayaasha dhaqaalaha, tababarrada xirfadaha iyo iskaashiga bani’aadanimada.

Madaxweyne Cirro waxa uu muujiyay sida xooggan ee ay Somaliland u danaynayso inay xidhiidh toos ah oo dhinacyo badan leh la yeelato Turkiga.