Madaxweyne Cirro oo la kulmay madax dhaqameedka Awdal

Hargeysa (QJ) – Madaxweynaha Somaliland oo safar shaqo ku jooga magaalada Boorama ayaa xalay kulan casho-sharaf iyo wada tashi ah la qaatay madaxda dhaqanka ee gobolka Awdal. Kulankan oo ay ka soo qayb galeen xubno ka tirsan Golaha Wasiirrada, masuuliyiinta heer gobol, iyo madaxda hay’adaha kala duwan ee maamulka.

Kulankan ayaa diiradda lagu saaray sidii la isaga kaashan lahaa, isla markaana loo taageeri lahaa dedaallada ballaadhan ee ay xukuumaddu ka waddo gobolka Awdal iyo guud ahaan Somaliland. Dadaalkan ayaa qeyb ka ah ballan qaadyadii uu Madaxweynuhu sameeyay xilligii ololaha doorashada.

Madax-dhaqameedka caanka ah ee gobolka Awdal oo halkaas ka hadlay, ayaa soo dhaweeyey sida daacadda ah ee uu madaxweynuhu uga go’an yahay inuu ka dhabeeyo dhammaan ballan-qaadyadii uu gobolka Awdal u sameeyey muddadii uu xilka hayey, gaar ahaan horumarinta kaabayaasha dhaqaalaha. Waxayna si cad u sheegeen inay si buuxda u garab istaagi doonaan dedaalada ay wadaan Madaxweynaha iyo xukuumadiisa.

Wasiirrada Wasaaradaha Arrimaha Gudaha, Madaxtooyada, Arrimaha Dibadda, Biyaha iyo Ciyaaraha oo iyaguna halkaas ka hadlay, ayaa ku dheeraaday dedaalka Madaxweynaha iyo Xukuumaddiisu ugu jiraan sidii gobolka Awdal loogu soo dabbaali lahaa horumar la taaban karo iyo guulo taariikhi ah, gaar ahaan kaabayaasha dhaqaalaha sida waddooyinka iyo madaarada oo muhiim u ah nolosha bulshada.

Madaxweynaha Somaliland, Mudane Cabdiraxmaan Cirro, oo gebo-gabadii munaasibadda soo gunaanaday, ayaa madaxda dhaqanka uga mahad-celiyey taageerada ay xukuumaddu ka geysato dedaallada horumarineed ee ay ka waddo deegaannadaas iyo ilaalinta nabadda iyo wada-jirka bulshada.

Madaxweynaha ayaa shacabka reer Awdal u sheegay in uu ka soo baxayo dhammaan waxyaabihii uu hore u ballan qaaday. Intii ay munaasibadaasi socotay waxa uu ku dhawaaqay lacagta loo qoondeeyay in lagu soo iibiyo mishiin soo saara hawada Ogsajiinta, taasi oo uu hore u balan qaaday cusbitaalka guud ee magaalada Boorama.

Madaxweyne Cabdiraxmaan Cirro waxa uu ku dheeraaday muhiimadda ay leedahay in madax-dhaqameedku ay doorkooda ka qaataan horumarinta midnimada iyo iskaashiga bulshada dhexdeeda. Isagoo hadalkiisa sii wata ayuu yiri “Waxaan rabnaa inaan ka dhabeyno balamihii aan qaadnay, waxaana loo baahan yahay in dhammaanteen laga wada shaqeeyo sidii loo gaari lahaa midnimada shacabka, gacmahana la is qabsan lahaa.