Madaxweyne Cirro oo ka hadlay qadiyada Falastiiniyiinta

Dubai (QJ) -Madaxweynaha Somaliland, C/raxmaan Maxamed C/llaahi (Cirro), ayaa ka hadlay Qadiyada Falastiiniyiinta, ka dib hadal uu u sheegay Madaxweynihii hore ee Mareykanka Donald Trump oo ku aadanaa suurta galnimada in Somaliland ay martigeliso Qaxoontiga Gaza.

Waxa uu ku nuux-nuux saday in Maraykanku taageero siyaasadeed iyo mid milatariba siiyo Somaliland, isla markaana ay dawladdiisu doonayso inay sii xoojiso xidhiidhka dublamaasiyadeed iyo dhaqaale ee kala dhexeeya Washington. Hase-yeeshee, waxa uu caddeeyey in aanu Maraykanku weli kala tashan Somaliland qaddiyadda qaabilaadda Qaxoontiga Falastiiniyiinta. Wuxuu ku nuux-nuux saday in go’aan kasta oo arrintan ku saabsan laga hor mariyo wada tashi diblomaasiyadeed. Madaxweyne Cirro waxa kale oo uu ku celceliyey in Somaliland ay garab taagan tahay shacabka Falastiin iyo xuquuqdooda, isaga oo ku nuux-nuuxsaday muhiimadda ay leedahay wada-hadallada diblumaasiyadeed ka hor inta aan tallaabo la qaadin.
Madaxweynuhu waxa uu caddeeyey in Somaliland ay tahay Carab, isaga oo sheegay in dalkiisu uu xidhiidh diblomaasiyadeed la leeyahay dhawr waddan oo Carbeed, isla markaana uu safaarado ku leeyahay qaar ka mid ah caasimadaha Carabta. Waxa uu muujiyay sida ay Somaliland u doonayso inay dalalka Carabta kala tashato arrimaha gobolka oo ay ku jirto arrinta qaxootiga Falastiiniyiinta, si loo xaqiijiyo mawqif midaysan oo waafaqsan danaha Carabta.

Waxa kale oo uu xusay in Somaliland ay doonayso inay si firfircoon uga qayb qaadato dedaallada Carabta ee lagu kobcinayo iskaashiga iyo is-dhexgalka, isaga oo carabka ku adkeeyay muhiimadda ay leedahay go’aannada wadajirka ah ee dalalka Carabta si loo gaadho yoolal istiraatijiyadeed oo faa’iido u leh dhammaan dhinacyada.

Gabagabadii, Madaxweyne Cirro waxa uu tilmaamay muhiimadda ay u leedahay ka faa’iidaysiga horumarka tignoolajiyada ee Somaliland horumar waara. Waxa uu xusay in dalkiisu uu horumar la taaban karo ka sameeyey dhinaca tignoolajiyada casriga ah, taas oo wax badan ka tari doonta kobcinta dhaqaalihiisa iyo kaabayaasha dhaqaalaha, korna u qaadaya meeqaamkiisa caalamka.

Waxa kale oo uu sheegay in Somaliland ay weli u furan tahay iskaashiga caalamiga ah ee horumarinta iyo xasiloonida. Waxa uu xaqiijiyay sida ay uga go’an tahay dowladdiisa inay la shaqeyso saaxiibada gobolka iyo kuwa caalamka si loo xoojiyo dhaqaalaha iyo horumarinta kaabayaasha, hubinta kobaca iyo xasilloonida joogtada ah.