Madaxweyne Afrikaan ah oo Ku Faanay Inaanu Weligii Xanuunsanin & Xeeladaha uu Adeegsado

Kampala 03. August 2017 (SDN/QJ):- Madaxweynaha Uganda Yoweri Musavani oo haatan 63 jir ah ayaa sheegey in waligiis uusan xanuunsanin intii uu madaxweynaha ahaa.

Musaveni oo talada dalkiisa hayey muddo 31 sano ah ayaa dadka weydiiyey iney weligood maqleen xanuunkiisa ama inuu isbitaal jiifo.

 

“Waligaa miyaad maqashay Musaveni ayaa xanuunsaday oo isbtitaal yaalla, 31kii sano ee la soo dhaafay? Maxaa yeelay waxaan raacaa xeelado caafimaad taasoo ugu dambeystii caawiso ka hor tagga cuduradaas. Qeyb badan oo cuduradaas ka mid ah waa laga hor tagi karaa” ayuu yiri Musaveni.

 

Hadalkan ayaa dad badan ula muuqda mid layaab ah marka la eego tirada madaxweynayaasha ee xanuunsan sanadkan oo kaliya.

 

Madaxweynaha Zimbabwe Robert Mugabe oo talada dalkaasi qabtay 1980kii ayay mucaaradku ku dhaliilaan inuu dalka ka maamulo Sariirtiisa isbitaalka dusheeda, ka dib markuu saddex jeer uu sanadkan oo kaliya safar caafimaad ku tagay dalka Singapore.

 

Madaxweynaha Nigeria Muhammadu Buhari ayaa muddo dheer London u jooga daweynta xanuun aan nuuciisa wali la shaacin.

 

Madaxweynayaasha Angola, Zimbabwe, Benin iyo Algeria ayaa safaro caafimaad ugu baxay dalka dibadiisa sanadkii la soo dhaafay.

Iyo Ugu danbayn Madaxweynaha Jamhuuriyadda Somaliland oo Socdaalo dhinaca Caafimaadka ah ku tegay London iyo Dalka Isu taga Imaaraadka carabta inkasta oo dawladu ujeedada Socdaalkiisa ku sheegtay Mid Nasasho.