Madaxweynaha Soomaaliya oo Baarlamaaka ka hor sheegay guulaha dawladiisa

Muqdisho (QJ) – Madaxweynaha Jamhuuriyadda Federaalka Soomaaliya, Mudane Xasan Sheekh Maxamuud, ayaa maanta si rasmi ah u furay kalfadhiga 6-aad ee Baarlamaanka 11-aad ee Baarlamaanka Federaalka Soomaaliya. Waxa uu ku bogaadiyay Guddoonka, Xildhibaanada Golaha Shacabka, iyo Aqalka Sare oo uu sheegay in dadaal badan ay sameeyeen kulamadii hore ee Baarlamaanka.

Madaxweynaha ayaa hoosta ka xariiqay howlgallada lagu xoreynayo deegaannada ay weli gacanta ku hayaan Khawaarijta (xagjiriinta) ee dalka. Wuxuu ammaan u jeediyay ciidamada XDS, Macawiisley (maleeshiyo beeleed) iyo ciidamada daraawiishta Puntland sida ay naftooda ugu hureen adkeynta amniga iyo difaaca qarannimada. Waxa uu sidoo kale carabka ku adkeeyay khatarta kooxda argagixisada ah ee Daacish ay ku hayaan dhaq dhaqaaqyada badda ee ka socda badda cas iyo gacanka cadmeed.

“Waxaan u taaganahay inaan garab istaagno ciidamada maamul goboleedka Puntland iyo bulshada deegaanka oo dhabar jab weyn ku ah kooxda Khawaarijta ah ee Daacish, dagaalkan waa dagaal xaq ah, waxaana waajib inagu ah inaan walaalaheen ku garab istaagno dagaalka lagu xoraynayo iyo soo celinta sharafteena.” Ayuu yiri Madaxweynaha.

Madaxweyne Xasan Sheekh Maxamuud ayaa xusay in heshiisyadii siyaasadeed ee lagu gaaray madasha wadatashiga qaran iyo ansixintii baarlamaanka ee afarta cutub ee ugu horreeysay dastuurka ay dhabaha u xaarayaan hirgelinta doorasho toos ah. Waxa uu ugu baaqay Baarlamaanka in inta uu socdo kalfadhigan ay soo dhameystiraan cutubyada ka harsan Dastuurka si loo xaliyo khilaafaadka ragaadiyay dhismaha dowladnimada Soomaaliya.

“Walaalayaal, shacabka Soomaaliyeed way na soo eegayaan, waxayna nagu aamineen masuuliyadda inaan ka baxno hab beeleedka khaldan ee wax lagu dooranayo, waa inaan fursad u siinaa inay si xor ah fikirkooda u dhiibtaan, codkoodana ugu dhiibtaan wakiillada ay dooranayaan, waa cadaalad darro weyn in dib loogu noqdo dhaqankii gurracan ee magacaabista iyo doorashada dadban,” ayuu yiri Madaxweynaha.

Madaxweynaha ayaa sidoo kale xusay in lagu guuleystay deymaha laga cafiyay dhamaadka sanadka 2023-ka iyo in dib loo soo cusbooneysiiyay ka faa’ideysiga kheyraadka Soomaaliya. Waxaa uu carabka ku dhuftay in dowladda Federaalka Soomaaliya aysan mudadaan wax deyn cusub ah qaadin, islamarkaana ay ka shaqeyneyso xoojinta iyo xoojinta dhaqaalaha iyadoo la adeegsanayo canshuuraha ay bixiyaan muwaadiniinta Soomaaliyeed. Wuxuu ku bogaadiyay ganacsatada iyo canshuur bixiyayaasha Soomaaliyeed sida ay ugu heelan yihiin horumarka iyo xasiloonida dalka.