Madaxweynaha Somaliland oo ka hadlay shaqaaleysiinta dhalinta si siman

Boorama (QJ) – Madaxweynaha Jamhuuriyadda Somaliland, Mudane Cabdiraxmaan Maxamed Cabdilaahi (Cirro), ayaa daah-furay shirweynaha afraad ee heer qaran ee shaqo abuurka iyo shaqada oo ay soo qaban-qaabisay Wasaaradda Shaqo-gelinta, Arrimaha Bulshada iyo Qoyska.

Munaasibadan oo ay ka soo qayb galeen xubno ka tirsan Golaha Wasiirada, Madaxda Hay’adaha kala duwan ee dawladda, Guddoomiyaha Hay’adda Shaqaalaha Dawladda, Badhasaabka Gobolka Maroodi-jeex, Masuuliyiin ka socday Jaamacadaha dalka, Wakiilo ka socday Shirkadaha waaweyn ee dalka, iyo marti sharaf kale.

Diirada shirka ayaa ahayd sidii loo soo saari lahaa fikrado cusub oo wax ku ool ah oo la xiriira shaqada iyo shaqada. Wasiirka Wasaaradda Shaqo-gelinta,Arrimaha Bulshada iyo Qoyska Marwo Milgo Maxamed Sanbaloolshe, ayaa ka warbixisay ujeeddada shirkan heer qaran oo ay ku tilmaantay in la abuurayo madal ay isugu imanayaan khubarada iyo qaybaha kala duwan ee bulshada, si looga tashado istiraatijiyadaha shaqo abuurka iyo sidii dhallinyaradu xogogaal ugu noqon lahaayeen fursadaha shaqo iyo is-beddelka suuqa shaqada.

Waxa ay sidoo kale carabka ku adkeysay baahida loo qabo in la dhaqan geliyo siyaasadaha iyo sharciyada heer qaran ee la xiriira shaqada iyo shaqada.

Madaxweyne C/raxmaan Maxamed C/laahi (Cirro) oo si rasmi ah u furay shirkan, ayaa hoosta ka xarriiqay inay ka go’an tahay xukuumaddiisa inay dhallinyarada u abuurto fursado shaqo oo loo siman yahay, isla markaana ay si caddaalad ah u heli lahaayeen fursadaha shaqo ee dalka ka jira.