Madaxweynaha Somaliland oo ka hadlay dalalka Itoobiya, Jabuuti iyo Mareykanka

Hargeysa (QJ) – Madaxweynaha Somaliland, C/raxmaan Cirro, ayaa si cad u sheegay in aanay Somaliland marnaba iska indho-tiri doonin xidhiidhka ay la leedahay dalalka Jabuuti, Itoobiya iyo Maraykanka oo ay hadda wadaagaan dano badan.

Madaxweyne Cirro oo khudbad ka jeediyey xarunta madaxtooyada oo uu kula kulmay golaha guurtida Somaliland, waxa uu ku dheeraaday muhiimadda ay leedahay ilaalinta xidhiidhka soo jireenka ah ee dalalkan.

Waxa uu si gaar ah u xusay in Itoobiya ay tahay dal saaxiib la ah muddo dheer, isaga oo iftiimiyay danaha la wadaago ee horumarinta dhaqaalaha, kobcinta amniga, xasilloonida bulshada, iyo isku xidhka gobolka. Waxa uu sidoo kale carabka ku adkeeyay in la sii xoojinayo xiriirka ka dhaxeeya Jabuuti.

Dhinaca Maraykanka, waxa uu qiray danta gaarka ah ee dalku ka leeyahay Somaliland, waxaanu ku ammaanay sharci-dejiyayaasha iyo guddiyada arrimaha dibadda ee Maraykanka sida ay ugu baaqeen inay xafiis dublamaasiyadeed ka samaystaan ​​Somaliland. Wuxuu caddeeyay in Somaliland ay mari doonto waddo kasta oo suurtagal ah oo lagu xoojin karo xiriirkan.

Madaxweyne Cirro waxa kale oo uu xusay in Somaliland ay xidhiidh wanaagsan la leedahay wadamo badan oo kale, waxaanu rajo ka muujiyey inay miro dhal ka soo baxaan dedaalladan dublamaasiyadeed.