Madaxii hay’adda nabad-sugidda qaranka oo xilka laga qaaday laguna eedeeyay Xilgudasho la’aan

Muqdisho 07.Sep 2014 (SDN/QJ)- Madaxii hay’adda nabad-sugidda qaranka Soomaaliya, Cabdullaahi Maxamed Cali (Sanbaloolshe) ayaa laga qaaday xilkii uu hayay, isagoo lagu eedeeyay inuu gudan waayay waajibaadka loo igmaday.

Shir uu yeeshay golaha wasiirrada oo uu guddoominayay raysul wasaare Cabdiweli Sheekh Axmed ayaa xilka looga qaaday Sanbaloolshe oo horey u ahaan jiray danjirihii Soomaaliya u fadhiyay dalka Britain.

Afhayeenka xukuumadda Soomaaliya, Ridwaan Xaaji Cabdiweli oo la hadlay warbaahinta ayaa xaqiijiyay xil-ka-qaadista lagu sameeyay Sanbaloolshe oo xilka hayay muddo ka yar labo bilood.

Tallaabadan ayaa timid iyadoo ciidanka hay’adda nabad-sugidda qaranka ay habeenkii Sabtida xireen labo idaacadood oo madax-bannaan oo ku yaalla magaalada Muqdisho, sidoo kalena xabsiga u taxaabeen saddex weriye.

Idaacadaha Kulmiye iyo Simba ayaa albaabbada la isugu dhuftay kaddib markii ay tebiyeen warar la xiriira hoggaamiyaha cusub ee Al-Shabaab.

Hay’adda nabad-sugidda ayaa horey uga digtay warbaahinta Muqdisho tebinta wararka la xiriira Al-Shabaab.

Muqdisho SDN/QJ

contact@qurbejoog.com