Maareeyaha Wakaaladda Biyaha Hargeysa Wuxuu Ku Qaban Waayay Lix Sannadood, Ma Ku Qaban Karaa Sannad Badhkii ?

Hargaysa 07.October 2016 (SDN/QJ):- Maareeyaha Wakaaladda Biyaha Hargeysa Ibraahim Siyaad Yoonis, ayaa su’aalo badan lagu waydiiyey Barnaamijka Qanci Dadkaaga ee ka baxa Telefiishanka HCTV.

Dadweynaha  oo loo fasaxay inay Maareeyaha Wakaaladda Biyaha Hargeysa waydiiyaan su’aal kasta oo Madmadow kaga jiro oo la xidhiidha Biyo-ballaadhinta Hargeysa, ayaa waxa dhallinyaro ka qayb-galay Maareeyaha waydiiyeen Su’aalo adag.

Waxaanu halkan idiinku soo gudbinaynaa qayb ka mid ah Su’aalaha la waydiiyey Maareeyaha Wakaaladda Biyaha Hargeysa Ibraahim Siyaad Yoonis, kuwaasi oo Telefiishanku si hor-dhac ah u baahiyey, waxayna Su’aalahaasi u dhaceen sidan:-

1. Maareeye Waxa jira Dad Guryahooda ay ku jirto Qasabadda Biyuhu, laakiin aanay wax Biyo ahi u soo dhicin, haddana bishii Lacag laga qaado, Dadkaa Maxaa idinka qorsheysan ?
2. Sannad kasta markuu dhammaanayo waxa la yidhaahdaa Sannadka dambe ayaa Biyo la helayaa, ee Ma rejuun baa, Miyaan Biyo la helaynin. ?
3. Maareeyuhu wuxuu Wakaaladda joogay Lix Sannadood, biyihiina sidii hore way ka sii rejo xun yihiin, Waayo? Waxaad arkaysaa Xaafado aan Toddobaad biyo helayn iyo kuwo Laba laba Maalmood ay u socdaan, arrintaa sidee wax looga qaban karaa ?
4. Midowga Yurub wuxuu Biyo-ballaadhinta Hargeysa ku bixiyey Labaatan Milyan oo Lacagta Euro-da ah, Labaatankaa Milyan haddii la geliyey biyaha maxay ka beddeshay Biyo la’aanta Hargeysa ?
5. Maareeye waxaad xilka haysaa Lix Sannadood, miyaad awoodi wayday inaad Biyaha Maraya Dooxa xidho oo aad u keento Mishiin lagu sifeeyo ? Miyaad u maleynaysaa in Lix Sannadood wixii aad ku qaban wayday, aad Sannad badhkii ku qabatid ?
6. Maareeye, Waxaad Sheegtay inaad xilka hayso Lix Sannadood iyo Hal bil, Muddadaa ILAAHAY Hal foostana haka dhigee maxaad Hargeysa ku soo kordhisay.”?