Ma Dhab Baa In Madaxweyne Siilaanyo Amray In  wasiir Sacad Aanu Raacin Weftigan Oo UAE U Tegi Doona Heshiiska Madaarka Millatari Ee Berbera?

Hargaysa 14. March 2017 (SDN/QJ):- Wefti wasiiro ah oo u ambabixi lahaa Dalka Imaaraadka oo loo xayiray Imaansha madaxweyne Siilaanyo ayaa labada maalmood ee soo socda tagi doona magaaladda Dubai, halkaas oo ay ka soo fulin doonaan wadahadaladii saldhiga Milatari ee madaarka Berbera.

Weftigan oo maalmahan ba la hadal hayey ayaa waxa soo if-baxaya in xukuumaddu ay ka reebtay wasiirka Arrimaha Dibeda Sacad Cali Shire, kaasoo halkiisii la galiyey Wasiiru-dawlaha wasaaradaasi Mixile Boqore, Wasiirka Arrimaha Dibeda Sacad Cali Shire ayey maalin dhaweyd saxaafadda qaarkeed qoreen in uu diiday in uu safarkan raaco, iyadoo lala xidhiidhiyey Diidmadda uu ka muujiyey Heshiiska Milatari ee Madaarka Berbera.

Hase yeeshee, warar kale ayaa sheegaya maadaama aanu ku qanacsanayn Heshiiskan in uu Madaxweynuhu go’aansaday in uu wasiiru-dawlaha u diro, taasoo ay dad badani hadal hayaan in ay talaabadan hordhac u tahay in aanu wasiir sacad sii joogi doonin kursiga.

Ma cada wasiir sacad goorta uu go’aan ka qaadan doono khilaafka soo jiitay ee u dhaxeeya isaga iyo madaxweynaha. sidoo kale lama garanayo goorta uu Madaxweyne Siilaanyo xilka ka qaadi doono.

Xigasho Wargaysa Waaheen