K’naan Warsame:Mitt Romney ma isticmaali kartid Heesteyda

Toronto Feb 02,2012(qurbejoog.com)-Fanaanka Soomaaliyeed ee reer Canada K’naan Warsame ayaa war uu maanta ku baahiyay barta Internetka ee Twitter in musharaxa u tartamaya in uu hanto musharaxnimada xisbiga Jamhuuriga ah ee dalka Mareykanka Mitt Romney in aanu isticmaali karin heestiisa Wavin Flag.

Mitt Romney oo xalay kolkuu hantay taagereyaasha xisbiga Jamhuuriga ee gobolka Florida waxa uu ku soo galay goob uu kala hadlayay taageereyaashiisa heesta K’naan.

“Mitt Romney waxaan ahay K’naan Warsame ma ayidsani fariintaada”ayuu K’naan ku yidhi fariin uu u diray Romney.

Fanaanka ayaa saxaafada u sheegay in aanan la soo weydiisan in heestiisa uu isticmaalo musharaxa,waxaanu intaa raaciyay in aanu maraba ogolaadeen hadii xitaa la soo weydiisto.

Dhanka kale waxa uu sheegay in hadii ololaha dib u doorashada madaxweyne Obama loo isticmaalo heesihii in aanu waxba ka qabin uuna soo dhaweynayo.

Hadalka ka soo yeedhay Fanaan K’naan ayaa wejigabax ku noqotay Mitt Romney,mase aha markii u horeysay ee tan oo kale ay ku dhacdo musharaxiinta Jamhuuriga.

Laba casho ka hor ayuunbey aheyd kolkii uu Newt Gingrich lagu qabsaday isna hees uu isticmaalay.

K’naan ayaa saxaafada u sheegay in uu iminka ka fiirsanayo in uu qareenadiisa hawlgeliyo si aan dib loogu isticmaalin heesihiisa.

Qurbejoog-Toronto
contact@somalidiasporanews.com