Khasaare Dhimasho iyo Mid baadi doon oo ka dhashay Roobab Xoogan oo Caawa ka da’ay Degmada Dilla ee Gobolka Awdal

Dilla 06.April 2016 (SDN/QJ):- Roob Xoogan oo Galabta ilaa Goor dhawayd oo Caawa ah ka da’ayay Degmada Dilla ee Gobolka Awdal ayaa la sheegay inuu Sababay Dhimashada Laba Ruux halka aan la hayn 7 Qof oo kale.

Waxaa Degmada  Dilla Goor dhawayd Gaadhay Gudoomiyaha Gobolka Awdal iyo Mas’uuliyiin kale oo Wehelisa Gudoomiyaha ayaa sheegay in Khasaaraha la hubo ee ilaa iminka ka dhashay Raxmada balaadhan ee Ka da’day Jiida Degmadaasi ay tahay Dhimashada 2 Ruux halka ay sidoo kalena raacdo ugu Jiraan 7 qof oo aan ilaa iminka la hayn Nolol iyo Geeri midka ay yihiin.

Gudoomiyaha ayaa sheegay in Khasaarahan uu Sabab u ahaa Dooxa Degmadaasi oo Dadku ag dageen kaas oo keenay inuu qaado.

Gudoomiyaha Gobolka Awdal Maxamed Cali Saleebaan Ramaax oo Markii aanu la hadlaynay ku dhex sugnaa dooxa degmada Dilla ayaa Dadweynaha ugu baaqay inay ka fogaadaan meelaha dooxyada iyo biyo mareenada waxaanu intaas ku daray inaan raxmada eebbe laga cabanayn balse loo baahan yahay Taxadar iyo feejignaan dheeraad ah.