Khasaaraha uu Sababay Qarax Xoogan oo Maanta ka Dhacay Agagaarka Taalada Xaawo Taako ee Magaalada Muqdisho

Muqdisho 01, October, 2016-(SDN/QJ):-Qarax loo adeegsaday gaari nuuca raaxada ah ayaa goor dhow ka dhacay magaalada Muqdisho, gaar ahaana afaafka hore ee Maqaaxi lagu magacaabo Blue Sky oo ku taala agagaarka taalada Xaawo Taako ee magaalada Muqdisho.

Gaariga laga soo buuxiyey waxyaabaha qarxa ayaa lasoo dhigay illinka hore ee maqaayadda, waxaana qaraxa ka dhashay qasaaro isugu jira dhimasho iyo dhaawac.

Inta la xaqiijiyey labo ruux ayaa ku dhimatay qaraxa lix kalena dhaawacyo ayaa kasoo gaaray, iyadoo uu jiro qasaaro hantiyadeed oo ka dhashay qaraxaasi.

Ciidamada amaanka ayaa goobta soo gaaray iyada oo iminka ay socdaan baaritaano ciidanka amniga ay wadaan.

“Maqaayad lagu Magacaabo Blue Sky ayaa lala beegsaday Qarax gaari, Welina khasaaraha ka dhacay lama oga.” ayuu yidhi Sarkaal ka tirsan Booliiska Somalia oo warbaahinta la hadlay.

Qaraxan ayaa imaanaya xilli dhawaanahan uu amaanka Muqdisho ahaa mid Wanaagsan, iyadoo aysan weli jirin cid sheegatay inay weerarkan mas’uul ka tahay, inkastoo qaraxyada noocan oo kale ah ay sheegato Al-shabaab.