Itoobiya oo ka hadashay ciidamada ka jooga Soomaaliya

Addis Ababa December 06, 2024(QJ) – Afhayeenka Wasaaradda Arrimaha Dibadda Itoobiya, Nebiat Getachew, ayaa soo dhaweeyay wada hadal lagu xalinayo khilaafka kala dhaxeeya Soomaaliya.

Nebiat Getachew ayaa taageeray qorshaha Kenya iyo Uganda ay ku dhexdhexaadinayaan muranka badda ee u dhaxeeya Itoobiya, Soomaaliya iyo Somaliland.

Mar wax laga weydiiyay go’aanka dowladda Soomaaliya ay kaga saartay ciidamada Itoobiya ee qeybta ka ah howlgalka nabad ilaalinta Midowga Afrika ee AMISOM, wuxuu ka gaabsaday inuu si toos ah uga hadlo su’aashaas, balse wuxuu caddeeyay in ciidamada Itoobiya ay sii wadi doonaan dagaallada ay kula jiraan Al-shabaab.

Madaxweynaha Kenya William Ruto ayaa dhawaan sheegay in isaga iyo Madaxweynaha Uganda Yoweri Museveni ay kala hadli doonaan madaxda Soomaaliya iyo Itoobiya sidii loo qaboojin lahaa xiisadda Geeska Afrika.

Dowladda Soomaaliya ayaa sheegtay inaysan wax wada hadal ah la geli doonin Itoobiya ilaa ay ka noqoto heshiiskii dhinaca badda ee Addis Ababa iyo Somaliland, kaas oo ku saabsanaa is-weydaarsiga aqoonsiga iyo dhul badeedka.

Hadalkan kasoo yeeray Itoobiya ayaa kusoo beegmaya xilli dowladda Soomaaliya ay si kulul u cambaareysay wax ay ugu yeertay falal xaasidnimo ah oo ay dowladda Itoobiya ka waddo gobolka Gedo, kuwaas oo ay ku lug leeyihiin hurinta colaadda beelaha deegaanka. Falalkan ayaa loo arkaa inay qayb ka yihiin faragelinta Addis Ababa ee ka dhanka ah madax-bannaanida iyo madaxbannaanida Soomaaliya.