Hawl-wadeenadii xukuumadeenu ma waxay noqdeen dha-dhan raac – dhuuni raac , isir-raac iyo sheerley – shirkadley danahooda gaarka ah door bidey?
Waa qormooyinkeenii duurxulka iyo afmal-dhaha ahaa ee udigaayey duulka digreetada aaminsan in ummadda lagu maamulo iyo kuwa sacabka u-garaaca ee intey abu-bidaarka diirtaan utafaxeytey sadbursiino,xaqiraad iyo nabarada duudsiga ah ee ay ku can baxeen, kuwaas oo aan laheyn sogordoh,asluub iyo anshax masuulnimo.Waa qormooyinkeenii qaawinaayey dhaqaraha aan bireysneyn ee xukuumada Siilaanyo biyo dhigay kuwaas oo galaafan doona nabad kuwada noolaanshaha JSL lagu majeeran jirey.
Shacabka Somaliland waxaa daashadey oo ay khatyaan la taagan yihiin mudadii ay xukuumada Siilaanyo hageysey, Dawlad musuq-maasuq hadheeyey, cadaawe siyaasadeed iyo colaad degaan oo isbarkan, habacsanaan iyo hogaan xumo saameysey habsami usocodka hawlahii dawladnimo. Dawlad aan muujin karin yuhuuntii quruxda qaranimada iyo karaamdii dawladnimo,dawlad xubnaheeda wasiirada kuwa ugu cad cadi aaney laheyn sogordoh,anshax iyo asluub masuulnimo,Dawlad aan wakiiladeeda utirinin xilalkooda oo dhameystiran (job-description) hawlwadeeno mikirifoono been ah uun ku adima oo ficilkoodii noqdey dhagax meel la dhigo oo aan dhameystir laheyn. Hayado dastuur ay mawjado khilaaf hadheeyeen oo isdhex-yaac ah oo aan isku kantaroolin hawlihii loo igmadey kuwaas oo xaalkoodii noqdey ku daneyso iyo ka daneyso, baarlamaankii ummadda u wakiilka ahaa oo ku milmay fulintii oo noqdey dha-dhan raac , dhuuni raac iyo hayb-raac danahooda gaar ka ah door bidey oo ka mid noqdey xubno ka tirsan xukuumada oo shidhka ugu jira lagana soo shidaaliyo mar marka qaarkood si ay u-maleegaan dabinada iyo duufaanada iyagii hada harqiyey ee shirkoodii xisbigu ka qabsoomi la yahay kuwaas oo baalmarey dhamaan dhaartii ay ummadda uga dhaarteen in ay wakiilo metela oo daacada u-noqdaan.
Hawl-wadeeno ku yimaada kuraan-boodooyin dhaah-dheer oo salka ku haya iskooxeysi,dhabar-taabasho qof jecleysi ah, isxulafeysi xaafadeysan oo awr-ku kacsi ah, kuwaas oo badankoodu aaney aqoon dheer iyo waayo-aragnimo u laheyn maamul wanaag dawladeed lakiin xariifiin ku ah sidii ay dhiilahooda carta leh uga dhaansan lahaayeen ee xoolo uga dhaqan lahaayeen hantida yar ee ummadda baahan wax loogu qaban lahaa, Waxaana ay siyaasada iyo xilalka u haystaan in lagu daneysto oo lagu xoogsado. Bal ka warama Agaasimayaal aan garaneyn xayndaabkii awoodeed ee Wasaaradahooda isuna arka in ay dadka ka sareeyaan oo iyaga loo shaqeeyo iyadoo qaar badan farta laga saarey qorshe hawleedkii iyo higsigii Wasaaradeed iyo kii qarankaba laakiin dhaqaajin waayey oo la anbadey kuwaas o o hadana xariifiin ku ah dus-duska, luf-lufka, af-dhuunyaaleysiga iyo difaaca xayndaabka madaxtooyada iyo shaqooyin aan loo igman oo ah dilaalnimo ,dhul-boob iyo ganacsi daaha dabadiisa uga socda.
Wasiiro aan aqoon in wasaaradahooda yihiin dar,yeel iyo weel ay ummaddu leedahay iyagana loo igmadey in ay ummadda u shaqeeyaan oo ay dawlada wakiil uga noqdaan. Wasiiro aan laheyn hilaad, higsi, biseyl siyaasadeed, odorosyo iyo aragti fog oo himbiriirsi khushi-talaabsanaya mar marka qaarkood. Wasiiro aan laheyn qorshe hawleedyo qaran oo qodobeysan oo qeexan oo ay ku hawlgalaan iyo halbeeg lagu cabiro waxqabadkooda ( quality insurance ). Xukuumad aan Agaasimayaasheeda iyo xisaabiya-yaasheeda iyo shaqaalaheedaba aan u soo xulan si xalaal ah oo xulasho aqooneed iyo waayo-aragnimo huwan taas oo aan hadana carbin, tababarin, tusaaleyn,dalacsiin, una-xaqsoorin oo aan aqoon u kordhin, hase yeeshee caado ka dhigatey in ay xataa agaasime waaxeedyada ku shaqaaleysiiso iskooxaysi,isireysi, xabkeysi, taajir wasteysi, eexas ho qaawan iyo qaraabo kiil ku qotoma ku raadgadasho iyo kula dhuuq maa-daama aan loo eegeyn haba yaraatee tar-tan, aqoon, karti ,hufnaan iyo waayo aragnimo. Waxaana xukuumadii maxsuulkeedii uu noqdey in qarankan yar ee yab-yabka, dhab-dhabka iyo yagleesha ahi uu ku danbeeyey mid hagaasey, hintaaqmey, doc-faruurmey oo waayey,hilaad, hinjin,higsi iyo hogaan hagaagsan, halbeeg hawl-qabad iyo agaasin jiheeya oo tubta u saara qorshe hawleedkii higsiga qaranka oo ku waqtiyeysan sanado, bilo, maalmo,isbuucyo iyo saacado. Nasiib daro wuxuu maanta habsami u socodkii hawlihii qarankan yar ee ragaadey ee raran ka saarani uu ku soo ururey mid aan ku Jihaysneyn toobiyaha toosan oo aan laheyn hadaf cad iyo yoolal uu higsado midna.
Allaa Mahad iyo Mudnaanba Leh
Wa-Laahum-Aclam-Wa-Bilaahi-
Wehelkiin Waa-Alleh iyo Nebi (scs)
Qalinkii : A/rahman Fidhinle
Intensive ED BD PA
United Kingdom
London.