( hareeraha ma qabannaa ) waa gabey ka hadlaya soomaalid han yarideeda iyo horumar la’aanteeda

 

1. Waayadan haloosiga murtida hoos umaan dayine
2. Hawlaha kalaa igu badnaa hanashadoodiiye
3. Hayeeshee hiyiga may ka gudhin haybaddii waliye
4. Hirkii mawjadduhu laabta  way ka hanqadhaayaane
5. Hileygaan ujiidee dibnuhu wayku hadayeene
6. Hindisiyo dareen igu dhashaa kiciya howraare
7. Markaassaan maluugtiyo hoggiyo hilin u eegaaye
8. Caawana halkaan  hibanayaan ka holan doonaaye

 

9. Been lama hawaystee runtaa lagu hanuunaaye
10. Waa hawl ma’waayaan adduun heerla joogaba’e
11. Dad’aan holof ujiidhini ladnaan hadhacsanmaayaane
12. Kuwa hodanka joogaa horey dhib’ugu hiileene
13. Qayrkeen dagaarbey hayaan ugu hilaadeene
14. Waakuwa dayaxa haybsadeen hadalka taagneyne
15. Hammi iyo dadaal wada jirey ku hano qaadeene
16. Hanku waa waxay aadamuhu libin ku hooyaane
17. Habaas kamakacaan duul haddey himilo liitaane
18. Haybteenu waa waxay filkood uga hagaaseene
19. Haddeydu hinjisaan guusha waa helilahaydeene
20. Goormeydun heensayn fardaha laydinka huleelye?

 

21. Hareeraha ma qabannaa wixii horumar keenaaye?
22. Oo maysku howllaa fadhiga kuma heleysaane?
23. Mise waa hurdeysaan sidii horeba loo sheegay?

 

 

24. Walow ay iyaba haybbo badan haatan kala sheegan
25. Culimada waxaan ku handadoon hiifo ma’anaaqe
26. Waanada kor iyo hoosba way ula hadlaayaane
27. Dadkaan dhago ku hoorsane iyagu kama habsaamaane

 

28. Dhib haweenka soomaaliyeed naguma howlaane
29. Dhankoodii iyagu way hanteen mey hareer marine
30. Reerahana qaybbey hayaan lagu haleeyaaye
31. Nafta iyo u hure maal waxay helikaraayeene
32. Hambalyiyo ducay mudanyihiin looga dhigo hiile

 

33. Raggan qaadka uun hiigayaa gabay halkoodiiye
34. Iyagaa halbowlaha jaroo heerey qarankiiye
35. Iyagaa iswada hiifayoon laba hishiineyne
36. Iyagaa halkii aad tagtaba hadal ka joogaaye
37. Iyagaa qabiilka  u halgama tol iyo hayb’haybe
38. Iyagaa dhalaanka u horkacay badahay hoobteene
39. Taariikhiihii horu mariyo haatan waxan jooga
40. Hilinkii samaha inan ragow walima haysaane
41. Hawadiyo naftiinaa sidii ulu hadreysaane
42. Cilmigii ku howshoonaseen heer gadiyiwaaye
43. Wali hooto dhiigliyo warmihii waaku  hilantiine

 

44. Inta hanad u loogteen dugaag hadimo aan gaysan
45. Ee hooyo madigiid disheen ayku hiraneysay
46. Ama aa hungiyo ciil badeen gabadh lasoo hooyay
47. Ama  hoojiseen ubad lahaa aabo hana qaadey
48. Tiradoodu waa hadur sidii dhagaxa haaraaye
49. Inta aad is wada haysataan libin ma hoysaane
50. Hilo durugsan goormaydu hadi laydinka huleelye?

 

51. Hareeraha ma qabannaa wixii horumar keenaaye?
52. Oo maysku howlaa fadhiga kuma heleysaane?
53. Mise waa hurdeysaan sidii horeba loo sheegay?

 

 

 

 

 

 

54. Dhibka hela qof soomaaliyuu maanku hibateyne
55. Heshiinwaydey koonfuri intay is horfadhiistaane
56. Xamar uguma hoyaadaan shacbigu nabad habeenkiiye
57. Haldoorkiyo dadkii waala dilay howl karka ahaaye
58. Duqay iyo haween iyo caruur looma hayb dayine
59. Birma gaydadii la hawiryoo toogte hororkiiye
60. Siyaasiga hirdamayiyo kufriga qolo hareer joogo
61. Dadka qaarna uma hiiliyaan labada haamoodo
62. Danni yari haduu hebel ka galo way holcinayaane
63. Hilbaa iigu yaal  maatidaa hoobiyuhu jaraye
64. Hurdo kama ladee jiifka waan  ka hanfariiraaye
65. Hagar’daamadooduu wadnuhu ila hafeeftaaye
66. Nabadaan hantiyo waa inuu helo walaalkeyye
67. Hadii kale inuu haanku dago waa hal aanjirne
68. Hadaan awrka dhaanka ah biyaha la isu haaneedin
69. Oo hareer qudhuun lagaga raro dheeli haamaha’e
70. Anaguna habkaasaanu nahoo waan u heerahaye

 

71. Waqooyigu amnigu hayso oo horumar sii ghaadha
72. Iyo koonfur oo nabad heshoy hadhisey liibaantu
73. Labadooda oo wada hadloo gaadha hadafkooda
74. Oo dunida sharaftey hanteen lagaga haasaawo
75. Allow noo hibee guusha iyo hodanka deeqdaada

Curiye    cabdiraxamaan xiiray

Cabdiraxmaanxiiray1@gmail.com