Gudoomiyaha Maxkamada Sare ee Somalia oo Shir kaga qayb galaya Nairobi iyo Jabuuti

Muqdisho 03.Nov 2013 (SDN)- Guddoomiyaha maxkamadda sare ee Soomaaliya, Caydiid Cabdullaahi Ilka-xanaf iyo wafdi uu hoggaaminayo ayaa maanta ka dhoofay garoonka diyaaradaha ee Aadan Cadde ee magaalada Muqdisho, waxayna ku sii jeedaan dalalka Kenya iyo Jabuuti.

Guddoomiyaha waxaa safarkiisa ku wehliya qaar ka mid ah garsoorayaasha maxkamadaha, waxaana lagu wadaa in dalalka ay u ambababaxeen uga qeyb-galaan kulamo looga hadlayo sharci ku saabsan la dagaallanka burcad-badeedda iyo horumarinta garsoorka dalalka ku yaalla Bariga Afrika oo Soomaaliya ay ku jirto.

Isagoo warbaahinta kula hadlayay gudaha garoonka Muqdisho, Ilka-xanaf wuxuu sheegay inuu ku faraxsan yahay ka qeyb-galka kulamada ka dhacay Nairobi iyo Jabuuti.

Wafdiga ayaa ku hor-maraya magaalada Nairobi oo uu uga qeyb-galayo kulanka oo ay ka qeyb-galayaan garsoorayaal ka socda dalalka Soomaaliya, Kenya, Jabuuti iyo Yemen.

Muqdisho SDN.

Qurbejoog.com