Gudida Doorashooyinka Somaliland oo Mudada u Kordhiyay Qandaraaska Xaraashka ee Gaadiidka Guddiga Doorashooyinka

Hargaysa 18.Feb 2015 (SDN/QJ)- Qandaraas lagu xaraashayo Gaadiidka ay leeyihiin Guddiga Doorashooyinka Qaranka oo hore loo shaaciyey, isla markaana loogu soo bandhigay ciddii danaynaysa inay ka qayb-qaataan, ayaa lagu kordhiyeyey muddo todoba maalmood ah.

Sida lagu sheegay qoraal ogeysiin ah oo uu ku saxeexan yahay Agaasimaha Waaxda Qandaraasyada ee Guddiga Qanadaraasyada Cabdirisaaq Maxamed Faarax, waxa loo muddeeyey wakhtiga la furayo 24-ka bishan February oo ciddii ku guulaysata lagu soo bandhigi doono Xarunta Hay’adda Shaqaalaha Dawladda.

“Waxa la ogeysiinayaa cidda danaynaysa Xaraashka Gaadiidka K.D.Q in Muddadii loo kordhiyey oo lagu daray 7 Cisho.

Haddaba, waxa dib loogu dhigay 24/02/2015 oo ah maalin Salaasa ah Saacaddu markay tahay 9:00 Subaxnimo, goobtuna waa hoolka Guddida Qandaraasyada Qaranka ee Xarunta Hay’adda Shaqaalaha Dawladda,” Sidaas ayaa lagu sheegay qoraalka ogeysiinta ee Guddiga Qandaraasyada Qaranku ku muddeysay wakhtiga la furayo qandaraaska