Guddoomiye Cabdiraxmaan Cirro oo Kulamo Diblomaasiyaddeed La Qaatay Guddoomiye Ku Xigeenka Baarlamaanka Sweden iyo Maayirka Magaalada Stockholm

Stockholm 18.June 2016 (SDN/QJ):-Guddoomiyaha aqalka golaha Wakiilada Somaliland ahna hoggaamiyaha xisbiga mucaaradka ah ee WADDANI Md.Cabdiraxmaan M.Cabdillaahi (Cirro), oo muddooyinkii dambe socdaal ku joogay dalalka Sweden iyo Finland, ayaa maanta kulamo la qaatay guddoomiye ku xigeenka 1aad ee Baarlamaanka dalkaasi Sweden Mr.Tobias Billstrom iyo weliba sida oo kale Maayirka magaalada Stockholm Mr’s. Karin Wanngard iyo xoghayaha golahaasi.

Kulamadan oo ahaa kuwo gooni gooni ah, ayaa ugu horreyn guddoomiye Cabdiraxmaan Maxamed Cabdillaahi iyo guddoomiye ku xigeenka Baarlamaanka dalkaasi Sweden Mr. Tobias Billstrom, waxa ay ka wada hadleen arrimo ku saabsan sii xoojinta xidhiidhka labada dal, isku xidhka baarlamaanada labada dal ee Somaliland iyo Sweden, doorashooyinka Somaliland, taabo-gelinta hanaanka dimuqraadiyadda iyo weliba is faham buuxa oo ay isla garteen siddii ay dawladda Sweden ay si toos ah uga la shaqeyn lahayd helidda Ictiraaf ay Somaliland ka hesho dalka Sweden iyo dalalka kale ee caalamka.

Ugu dambeyntiina, guddoomiyaha xisbiga WADDANI Md.Cabdiraxmaan M. Cabdillaahi (Cirro), waxa uu sida oo kale uu iyagana kulan gooni ah uu la qaatay Maayirka magaalada Stockholm Mr’s Karin Wanngard iyo xoghayaha golahaasi, isaga oo kala hadlay arrimo ku saabsan xidhiidhka golaha deegaanka Stockholm iyo goleyaasha deegaanka Somaliland, isla mar ahaantaana ay iska ga kaashan lahaayeen horumarka iyo wada shaqeynta labada dal, gaar ahaana golaha deegaanka Stockholm ay ku dhiiradaan siddii ay taageero iyo adeegyo aqoon korodhsiyeed ba ay u gaadhsiin lahaayeen goleyaasha deegaanka Somaliland.