Golaha Wasiirada Soomaaliya Oo Go’aamo Ka Soo Saaray Xaalada Amni Ee Dalkaasi

Muqdisho 02.March 2016 (SDN/QJ):- Golaha Wasiirada Xukuumada Soomaaliya oo shir aan caadi ahayn uu u socday muddo saddex maalmood ah ayaa soo saaray go’aamo ku aadan xaalada amniga ee dalkaasi soomaaliya.

War-murtiyeed laga soo saaray shirkaasi ayaa waxa uu u dhignaa sidan:- “Shirkii Golaha Wasiirada ee aan caadiga ahayn ee socday saddexdii maalmood ee la soo dhaafay, oo uu shir guddoominayey Ra’iisul Wasaaraha Xukuumadda Federaalka Soomaaliya Mudane Cumar C/rashiid Cali Sharmaarke, laguna Casuumay Madaxweynaha Jamhuuriyadda Federaalka Soomaaliya Mudane Xasan Sheekh Maxamuud, oo loogu kuur-geliyey xaaladda amni ee dalku hadda ku sugan yahay ayaa Waxa la isku raacay baahida loo qabo in hoos loo daadajiyo sugidda amniga dalka, sidii ay horeba u ahaan jirtey iyo in fursad loo siiyo Shacabka Soomaaliyeed in ay kaalin mug leh ka qaataan sugidda amniga, loona helo isla xisaabtan dhab ah,waxaana la go’aamiyey;

1.Waxa la dajiyey qorshe dhamaystiran oo lagu sugayo amniga iyo nabadgelyada guud ahaan dalka, gaar ahaana magaallo madaxda dalka ee Muqdisho.

2.In Talisyada Ciidamadda Nabadgelyada ee Booliska iyo Nabad-sugidda ee heer gobol, fadhigooduna yahay Gobolka Banaadir (Muqdisho) ay si toos ah ula shaqeeyaan Maamulka Gobolka Banaadir, iyagoo ku howl galaya awaamiirta iyo tilmaamaha maamulku ku sugayo Nabad-gelyada iyo Amniga magaalo madaxda dalka ee Muqdisho.

3.Si loo fuliyo qoshaha Nabadeynta iyo Xasalinta guud ahaan dalka, gaar ahaan Magaalo madaxda dalka ee Muqdisho, waxaa la mamnuucay;

• In Ciidan aan ka tirsanayn ciidanka loo qoondeeyey degmo kasta, aanay wax hub ah oo aan shaqo la og yahay ku jirin lala dhex-mari karin degmooyinka Gobolka Banaadir.
• In Ciidamadda ay wattaan Wasiirada, Xildhibaanada iyo madaxda kale ee dawladda ay sitaan aqoonsi u gaar ah.
• In Ciidamadda iyo Hubka ay leeyihiin shirkadaha amniga ee gaarka loo leeyahay ay iska diiwaan geliyaan Wasaaadda Amniga Gudaha, haddii ay wax dhaq-dhaqaaqa sameynayaana ku wargeliyaan maamulka degmada ay ka baxayaan iyo degmada ay tagaaan.
• Guud ahaan dalka, waxa reeban haysashada hub sharci darro ah oo aan ka diiwaan gashanayn Wasaaradda Amniga.
• Golaha Wasiirradu waxay isla garteen in dib-u-dejin loo sameeyo Barakacayaasha, iyadoo lala kaashanayo Hay’adaha Caalamiga ah, si ay uga qeyb qaataan horumarka iyo Nabad-gelyada dalka.

Baaq

Waxaa loogu baaqayaa guud ahaan shacabka Soomaaliyeed, in ay taageeraan, gacana ka geystaan qorshaha dawladdu ku sugeyso amniga iyo xasilinta dalka.