Gawaari dawo u siday Al Qudus Hospital oo la duqeeyay

Qasa November 08, 2023 (QJ) -Gawaari Bisha Cas leedahay oo u siday gargaar caafimaad Isbitaalka Al Quds ayaa la weeraray maanta. Qaar ka mid ah darawalada ayaa ku dhaawacmay. Kolonyada gawaarida Bisha Cas ayaa markaa u socday isbitaalka Shifa halkaas oo ay u sideen daawooyinka.

Lama oga cidda weerartay kolonyada, oo ka koobnaa 5 baabuurta xamuulka qaada iyo 2 baabuur oo ambulance ahaa oo ay la socdaan saraakiil ka tirsan Bisha Cas. Weerarkan ayaa ku soo beegmay iyada oo Israa’iil ay duqenysay aagga Isbitaalka Al Quds ee waqooyiga Gaza.

Ciidamada Israel ayaa sheegay inay hareereeyeen waqooyiga Gaza, halkaas oo dagaalku ka socdo.

Israa’iil ayaa sheegtay in 31 askarteeda lagu dilay dagaalkii ugu dambeeyay, waxaana ay ka jawaabeen sii xoojinta weerarada goobaha rayidka.

Tirada dadka ku dhintay duqeynta Gaza waa 10,400, tirada dadka dhaawacmay waa in kabadan 20,000 oo qof.