Faransiiska ayaa ugu baaqay golaha amniga Qaramada midoobay inuu isugu yimaado fadhi ay kaga arimiyaan xaaladda dalka Jamhuuriyada badh-tamaha Afrika

New York Mar 25,2013(SDN)-Faransiiska ayaa ugu baaqay golaha amniga Qaramada midoobay inuu isugu yimaado fadhi ay kaga arimiyaan xaaladda  dalka Jamhuuriyada badh-tamaha afrika ka dib markii ay falaagada hubaysani soo galeen  caasimada  dalkaasi ee Bangui.

Af-hayeenka madaxtooyada Faransiiska ayaa waxa uu sheegay in xukuumada  Pariis ay ugu baaqday dadkooda jooga dalkaasi inay ku  joogaan Guryahooda oo aanay ka soo bixin,

Af-hayeenku waxa uu intaa raaciyey in dalkaas ka joogaan  faransiiska  laba boqol iyo konton askari,mana jiro ayuu yidhi af-hayeenku wax go’aan ah  oo ku saabsan in xoojin loo diro ciidanka dalkaas ka jooga.

Wararka  soo baxaya ayaa sheegaya in faransiisku ciidan geeyey Garoonka dayuuradaha  Magaalada Namgui si ay amaankiisa u ilaaliyaan.

Waxa kale oo uu sheegay af-hayeenku, in madaxweynaha  Faransiisku Nr, Faransuwa Holand  oo kala hadlay dhowr goor  ururka Midowga  afrika  iyo Urur  Goboleedyada  inay ka shaqeeyaan sidii loo dejin lahaa xaaladda Jamhuuriyadda  badh-tamaha afrika ka taagan.

Dhinaca kalena  Af-hayeen u hadlay falaagada ayaa isagu waxa uu sheegay in ciidamadoodu ay galeen caasimada Bangui, madaxweyne Bozize uu ka  baxay caasimada. Waxaanuu af-hayeenku ugu baaqay ciidamada  inaanay geysan wax xad-gudub ah,dhac iyo biliqo hantida dadka ah.

SDN-New York

contact@somalidiasporanews.com