Ehelada rakaabkii saarnaa diyaaradda Malaysia ee la waayay oo Dibad-bax ka dhigay dalka Shiinaha, maxay tahay sababtu?

Beijing March 25, 2014 (SDN)- Ehelada qaar ka mida dadkii saarnaa diyaaradda dunida dhakafaarka ku riday ee laga leeyahay Malaysia, tirsigeeduna ahaa 370 oo muddo laba todobaad badan la la’yahay, ayaa dibad-bax ka sameeyay jidadka caasimadda Beijing ee dalka Shiinaha.

Dibad-baxeyaasha oo ku qaylinayay ama ku dhawaaqayay ‘beenalayaal’, waxay ka cadhoodeen dhawaaqa dawladda Malaysia oo shaacisay in la hakiyay baadhitaanka lagu baadigoobayay diyaaraddaas oo la waayay 8-dii bishan March, taasoo kasoo duushay caasimadda Malaysia ee Kuala Lumpur, kuna jihaysnayd magaalada Beijing ee dalka Shiinaha.

Diyaaraddu waxay siday 239 qof oo ay 150 ka mid ahi u dhasheen Shiinaha.

Inkastoo Australia oo qayb ka ah raadinta diyaaraddaas oo ay ka qaybqaadanayaan inka badan 30 dal oo caalamka ku kala yaala, ay sheegtay in satellite keedu sawiray wax u eg raqda diyaaradda, haddana ilaa haatan si cad looma sheegin dhab ahaan waxay diyaaraddu ku sugan tahay.

Laakiin, dawladda Malaysia waxay shalay shaacisay in laga yaabo in diyaaraddaas ay ku dhacday Badweynta Hindiya, isla markaana ay dhinteen dhammaan dadkii saarna, inkastoo aan la isku raacin burburka Australia sheegtay inay aragtay.

Xukuumadda Malaysia waxay sheegtay in Salaasaddii maanta oo dhan la hakiyay raadinta diyaaradda, cimilada oo aad u xun awgeed, taasoo keentay in ehelada rakaabka aan warkooda la haynin ee diyaaraddu siday ay ka cadhoodaan wararka kala duwan ee todobaadyadan ka soo baxayay dawladda Kuala Lumpur eek u saabsan diyaaradda, isla markaana ehelada mudaharaadka dhigay ay masuuliyiinta dalkaas dhawaaqyadooda la xidhiidhiyaan kuwo ‘been ah’.

Qurbejoog.com, Beijing