Doorashada Madaxweynaha Cusub ee Gal Mudug Axmed Ducaale Xaaf oo Sababtay Khasaare Nafeed oo Yimid Markii la doortay

Gaalkacyo 03. May 2017 (SDN/QJ):-Rasaas iyo madaafiic loogu dabaaldegayey guusha doorashada Madaxweynaha cusub ee maamulka Galmudug Axmed Ducaale Geelle Xaaf ayaa maanta laga riday koonfurta magaalada Gaalkacyo oo maamul ahaan hoos taga Galmudug.

Wararka ayaa sheegaya in qaar ka mid ah hubkaasi dabaaldega loo ridayey uu khasaare nafeed ka geystay labada qeybood ee magaalada Gaalkacyo.

Ugu yaraan afar ruux oo ay ku jiraan labo caruur ah ayaa ku dhaawacmay madfac ku dhacay xaafado ka tirsan woqooyiga magaalada Gaalkacyo oo maamul ahaan hoos taga Puntland.

Sidoo kale, qof shacab ah ayaa ku dhaawacmay koonfurta magaalada Gaalkacyo ka dib markii ay haleeshay rasaas taageerayasha Xaaf ay ku dabaaldegayeen.

Qaar ka mid ah shacabka magaalada ayaa khal khal xoogan uu ku dhacay iyagoo u qaatay inuu dagaal mar kale ka qarxay Gaalkacyo ka dib markii koonfurta magaalada ay mar kaliya isqabsatay rasaas iyo madaafiic loogu dabaaldegayey guusha Xaaf.