Deegaano Cusub oo ka Tirsan Buuralayda Galgala oo Ciiidamada Punt land qabsadeen

Garowe 06.Jan 2015 (SDN/QJ)- Ciidammada maamulka Puntland ayaa malleeshiyada Al-Shabaab maanta kala wareegay gacan ku haynta deegaanno dhowr ah oo ku dhow-dhow deegaanka buuraleyda ah ee Galgala oo ka tirsan gobolka Bari.

Kornayl, Cabdulqaadir Maxamuud oo hoggaaminaya ciidammada Puntland ee Al-Shabaab kula dagaallamaya deegaannadaas ayaa xaqiijiyay qabsashada deegaannadaas.

Sarkaalka ayaa xusay inay iyagu weerareen saldhigyada ay ka qabsadeen Al-Shabaab, ayna la wareegeen dhammaanba goobaha ay ku weerareen.

Wuxuu tilmaamay in ciidammada Puntland oo kaashanaya shacbigu ay sii wadayaan dagaalka ay kula jiraan malleeshiyada, inta ay ka cirib-tirayaan gabi ahaanba deegaannada maamulka.

Dagaalkii ugu dambeeyay oo labada dhinac ku dhexmara deegaannadaas shalay oo ahayd Isniin ayaa waxaa ku dhimatay lix qof, waxaana ku dhaawacantay tiro kale.

Garowe SDN/QJ