Dawlada Federaalka Somalia oo Markii Kowaad ka Hadashay Sababtii Keentay in Heshiiskii Duulimaad ee Nairobi ay Kenya Xagal Daaciso

Muqdisho 06. April 2017 (SDN/QJ):- Labo diyaaradood oo doraad ka baxay garoonka diyaaradaha Aadan Cadde ee magaalada Muqdisho kuna sii jeeday magaalada Nairobi ayaa ku hakaday garoonka Diyaaradaha Wajeer halkaas oo saacado lagu xanibay rakaabka diyaardahaasi saarnaa baaritanao dheeraad ahna lagu sameeyay.

War Saxaafadeed kasoo baxay Wasaarada Warfaafinta Xukuumada Soomaaliya ayaa lagu sheegay in uusan waxba iska bedelin heshiiskii ay wada saxiixeen Madaxweynaha Soomaaliya iyo Madaxweynaha Kenya ee dhanka socdaalka,.

 

 

Halkan ka AKhriso Warka kasoo baxay Wasaarada Warfaafinta.

Doraad oo ay taariikhdu aheyd 4ta April 2017 waxaa dhacday in labo diyaaradood oo u socday Nairobi ay sii mareen Wajeer, halka labo kalena ay si toos ah u aadeen Nairobi.

 

Dowladda Federaalka oo baaris sameysey ayaa waxaa lagu ogaaday in sababta labada diyaarad loo marsiiyey Wajeer ay aheyd cilad farsamo ee la xiriirta xiriirka Saadaasha Hawada iyo ruqsada duulimaadka oo haba yaraatee aysan wax lug ah ku laheyn heshiisyadii Soomaaliya iyo Kenya dhex maray ee ku aadanaa in diyaaradahu ay si toos ah u aadayaan Nairobi.

 

Dowladda Federaalka waxaa ka go’an oo ay marwalba diyaar u tahay sidii shacabka Soomaaliyeed loogu bandhigi lahaa xaqiiqada ku hareereysan dhacdadii doraad oo ay labada diyaaradood ku mareen Wajeer.

 

Dowladdu waxey xooga saari doontaa in shirkadaha diyaaradaha ay hubiyaan ka hor inta aysan ka duulin gegida diyaaradaha Muqdisho inay heystaan fasixii iyo dokumentigii aasaaska u ahaa duulimaadkooda, si aysan shacabka Soomaaliyeed ee rakaabka ah aysan ula kulmin daahis iyo culeys.