Ciidan Si Gaar ah u Tababaran oo Amar buuxa lagu siiyay Gacan ku soo dhigista Suldaan Wabar

Hargaysa 25.Dec 2014 (SDN/QJ)- Ciidamada qaranka, gaar ahaan kuwa loo yaqaan Kamaandowska ee sida gaarka ah u tababaran ayaa shalay gaadhay magaalada Qulujeed ee gobalka Awdal, iyagoo doonaya inay soo qabtaan Suldaan Wabar oo la tuhunsanyahay inuu jiidaas ku jiro.

Laba guuto oo ka tirsan ciidamada Kamaandoowska ayaa gaadhay jiidaas, iyagoo abaari doona deegaano ay hay’adaha sirdoonka Somaliland aaminsanyihiin inay Suldaanka iyo kooxaha la socdaa ku dhuumaalaysanayaan islamarkaana ay ka soo dirayaan farriimo hanjabaad ah.

Sida uu warku sheegay labadan guuto waxa ay amar ku qabtaan inay soo qabtaan Suldaanka iyo kooxdiisa oo hubaysan, iyadoo uu isla doraad madaxweyne-xigeenka Somaliland Md. Saylici ku dhawaaqay inay xukuumadu Suldaan Wabar u aqoonsantahay khaa’inul wadan. “Ninkaasi wuxuu ka baxay heshiiskii Umadda Somaliland ku heshiisay ee ahaa Cidii ka baxda in Umadda Somaliland meel uga soo wada jeedsato oo gacanta la wada saaro,markaa waxaanu Ninkaas iyo wixii la socdaba u aqoonsanay Nin Qaran dumis ah, waxaanu noogu astaysan yahay Nin Khaa’inul waddan ah.” Ayuu yidhi Saylici.

Si kastaba ha ahaate, labadan guuto ayaa la filayaa inay maanta bilaabaan hawlgalka ay ku raadinayaan Suldaan Wabar oo la tuhunsanyahay inuu ku jiro deegaanada ay ciidanka qaranku abaareen.