Ciidamada Puntland oo dilay ugu yaraan 57 dagaalyahan oo ka tirsanaa Daacish

Bosaaso (QJ) – Ciidamada Difaaca Puntland oo galay maalintii labaad howlgal la doonayo in lagu burburiyo kooxaha argagixisada ah ee ku sugan dooxada Jeeceel ee buuraleyda Cal-miskaad, ayaa ku dhawaaqay wareegii labaad ee khasaaraha soo gaaray maleeshiyada Daacish.

Warbixin ay wehliyeen sawirro uu soo saaray taliska difaaca Puntland ayaa lagu sheegay in ciidamadooda ay xalay ilaa maanta dileen illaa 57 ka tirsan maleeshiyada Daacish, kuwaas oo u badan dagaalyahanno ajaanib ah oo dalal kala duwan ka yimid.

“Ciidanka Difaaca Puntland oo laba maalmood oo xiriir ah hawlgallo ka dhan ah argagixisada ka waday aagga Dharin iyo Qurac ee dooxada Jeceel, waxay ku dileen argagixisa dheeraad ah, tirada guud waxay ka badan tahay 57,” ayaa lagu yiri qoraalka.

Warbixinta ayaa sidoo kale lagu xusay in ciidamadu ay si buuxda uga sifeeyeen goobihii ay colaaddu ka jirtay ee ku teedsan dooxada Jeceel dhammaan kooxaha argagixisada ah.