Booliska Bossaaso oo qabqabtay taageereyaal Daacish ah

Bosaaso (QJ) – Taliyaha Qaybta Booliska Gobolka Bari Gaashaanle Sare Cabdiqaadir Jaamac Dirir ayaa ka warbixiyey howlgallada amni ee ka socda gobolka. Waxa uu sheegay in Ciidamada Booliska Boosaaso ay gacanta ku dhigeen xubno badan oo ka tirsan Daacish oo ku howlanaa uruurinta lacagaha iyo qaraxyada.

Korneyl Dirir ayaa ku nuux nuuxsaday in iyadoo ay barbar socdaan howlgalada ciidamada ay ka wadaan Buuraha Cal-Miska ay magaalada Boosaaso ka socdaan howlgalo xoogan oo lagu xaqiijinayo amniga, si meesha looga saaro kooxda Daacish.

Dadka deegaanka ayuu ku ammaanay doorka ay ka qaateen soo gudbinta shaqsiyaadka ay ka shakiyaan, taasoo gacan ka siisay ciidamada ammaanka inay gacanta ku soo dhigaan xubno muhiim ah oo ka tirsan Daacish. Waxa uu tilmaamay in wada shaqeynta shacabka ay si weyn uga qeyb qaadatay guulo laga gaaray howlgalladaasi.

Dadaallada amniga Boosaaso ayaa weli diiradda lagu saarayaa burburinta shabakadaha dhaqaalaha ee Daacish iyo ka hortagga weerarada argagixisada.