Biden oo ka haray tartanka madaxtinimada

Washington July 21, 2024(QJ )-Madaxweyne Joe Biden ayaa ku dhawaaqay in aanu dib isu soo sharaxi doonin, isagoo si hufan u soo afjaray ololihiisa doorashada mar labaad. Qoraal uu soo dhigay baraha bulshada ee X ayuu Biden ku sheegay in uu sii hayn doono xilka madaxweynaha iyo taliyaha guud ilaa iyo bisha January ee sanadka 2025, waxa kale oo uu xusay in uu qaranka la hadli doono dabayaaqada todobaadkan.

Go’aanka Biden waxa uu u banaynayaa dariiqa Madaxweyne ku xigeenkiisa, Kamala Harris, ay u noqon laheyd haweenaydii ugu horreysay ee Madaw ah ee u tartanta jagada Madaxweynaha. Biden, oo 81 jir ah, ayaa taageero buuxda u muujiyay Harris inuu tahay musharraxa Dimuqraadiga.

Weli lama hubo haddii Dimuqraadiyiinta kale ay Harris kula tartami doonaan magacaabista madaxweynaha Dimuqraadiga ama haddii xisbigu uu tartanka u furi doono dhammaan tartamayaasha.

Go’aanka Biden ayaa yimid ka dib cadaadis dadweyne iyo mid gaar ah oo uga yimid sharci-dajiyayaal iyo mas’uuliyiin ka tirsan Dimuqraadiga oo ku booriyay inuu ka tanaaasulo xilka ka dib qaabkii liitay ee uu ku soo bandhigay dooddii  uu la galay  murashaxa xisbiga Jamhuuriga Donald Trump.