Badhasaabka Gobolka Meru Ee Kenya oo Difaacay Socdaalkiisii Somaliland

Nairobi 10.Sep 2016 (SDN/QJ):- Badhasaabka gobolka soo saara qaadka ee  Meru ee dalka Kenya Mr Peter Munya, ayaa si adag u difaacay  socdaalkiisii  uu ku yimi Somaliland  bishii July ee la soo dhaafay, kaasi oo ka cadheysiiyay xukuumadda itaalka daran ee Soomaaliya.

Hadalka badhasaabka  Meru oo ay maqaal ka  qortey majaladda Daily Nation ee ka soo baxda Kenya,  oo aan soo turjunnay waxa uu u qoraa sidan:- “Peter Munya ayaa difaacay socdaalkiisii  Somaliland isaga oo ku adkeystay in aanu sameyn wax faragelin ah  oo dhuleed sida ay ku eedeeysay  dowladda Soomaaliya.

Badhasaabka oo hadalladiisu yihiin qaar cad-cad, waxa uu sheegay  in aanu ka qoomameyneyn  booqashadiisii Somaliland ee uu ku tagay  Hargeysa  oo uu  dedaal ugu jirey sidii uu beeraleyda Miraa ugu dagaalami lahaa  suuq ay  u helaan jaadka siday weyn ay  ugu  tiirsan yihiin.

Danjiraha  Soomaaliya u fadhiya   Kenya Jamaal Xasan,  ayaa kula boodey eedeyn socdaalkii  Mr Munya ku tegay Hargeysa, waxaanu ninkaas safiirka ahi ku eedeeyay in tallaabadii Soomaaliya qaadka Kenya u joojisay ay ka dhalatay cadho laga qaaday socdaalkii Badhasaabka Meru ku tagay Somaliland.

Haseyeeshee  Mr Munya,  oo ka hadlayay isu soo bax ka dhacay khamiistii deegaanka  Igembe  waxa uu si cad u sheegay inaanu   qoomameyneyn booqashadiisii Somaliland  oo uu  ka shaqeynayay inuu wax la qabto beeraleydda Mira.

Badhasaabku waxa uu sheegay in ay tahay masuuliyad saaran dowladda Kenya  inay suuq uga abuurto qaadka Miraa  Soomaaaliya iyo dalal kaleba iyada oo aan arrinta siyaasadeyn.