“Anigu Laga Bilaabo Marka Uu Madaxweyne Siilaanyo Haakah ka Yidhaahdo Kursiga Madaxweynenimada Musharrax Baan Ahay, Muuse Biixina………” Wasiir Samaale”

Hargeysa:25-March-2014(SDN)-Wasiirka Wasaaradda Maaliyadda Somaliland Cabdicasiis Maxamed Samaale, ayaa markii ugu Horraysay Si cad u sheegay inuu Yahay Musharrax u taagan Madaxtinimada Dalka, balse uu kaliya ka Hor taagan yahay Madaxtimida Siilaanyo ee Xilligan taagani.

Wasiir Samaale oo Haatan shir Jaraa’id ku qabtay Xarunta Wasaaraddiisa, ayaa tilmaamay in Marka uu Madaxweyne Siilaanyo Ka Dhergo kursiga Dalka looga Taliyo uu isagu noqon doono Musharax u taagan Madaxtinimada Dalka, waxana uu intaas ku daray inuu Haatan Ixtiraamka Madaxweynaha Dartii aanu u  ahayn Musharax xilligan la Joogo.

“ Anigu Laga Bilaabo Maalinta u Madaxweyne siilaanyo Haakah (ka dhergo) kursiga Madaxweynenimada Musharrax Baan ahay, Muuse Biixina waan u daayey Guddoomiyenimada Xisbiga Kulmiye.” Ayuu yidhi Wasiir Samaale oo Saxaafadda la Hadlayey.

Wasiir Cabdicasiis Maxamed Samaale ayaa in Badan ku dheggenaa inuu Noqdo Guddoomiyaha Xisbiga Kulmiye, waxana uu  Hankiisu caqabad ku ahaa Dib u dhacyo iyo muran in badan ku dhex jirey Xisbiga Kulmiye oo sababay in shirarkii xisbigu wakhtigii loo qoondeeyey dib uga dhacaan.

Hadalkan ka soo Yeedhay wasiir Samaale ayaa sidoo kale u Daaha ka Rogay in Wasiir Samaale Mar horeba loo Sheegay inuu Shanta sano ee soo socda Madaxweyne Siilaanyo Yahay Musharaxa Xisbiga, sidaas Darteedan lagu Qanciyey inuu iskaga Tanaasulo Guddoonka Xisbiga maadaama aan isaga iyo Muuse midna meeli uga Bannaanayn musharaxnimada Xisbiga oo Uu Madaxweynuhu soo Noqon doono.

S.D.N

Contact@somalidiasporanews.com