Al-shabaab Oo Markale Jab Weyn Gaadhsiisay Ciidamada Kenya Iyo Khasaaraha Weerar Jid-gooyo ah Oo Ay Ka Fuliyeen Deegaanka Libooy
Liboy:May,07,2015(SDN/QJ)-Kooxda Al-shabaab, ayaa weerar Jid-gooyo ah ku laysay Tiro kamid ah Ciidamada waddanka Kenya, iyagoo khasaare kala duwanna gaadhsiiyey tiro gaadiid ah oo ciidamadaasi wateen, waxana weerarkaasi dhacay galabnimadii shalay.
Ciidamadani la dilay ayaa kasoo baxay deegaanka Liboy oo 18km u jirta xuduud, waxa ayna kusoo jeedeen Magaalada Dhoobley, iyaga oo watay gaadiid dagaal oo gaadhaya ilaa Shan.
Gaadiidkani ayaa waxaa wadada u galay Maleeshiyaadka Alshabaab waxaana la tilmaamayaa inay u adeegsadeen Hubka noocyadiisa kala duwan, iyagoona halkaasi ku gubay ilaa hal gaadhi oo ku xidhnaa qoryaha waaweyn.
Sidoo kale weerarkaasi ayaa waxaa burbur xoogan kasoo gaadhay gaadhi nooca saadka oo Ciidamo kale u siday raashin, iyadoona la sheegay in halkaasi ay ku geeriyoodeen ilaa Lix kamid ah Ciidamada Kenya oo la kala socday gaadiidka, halka dhaawacana uu ka gaadhaayo Afar.
Qaraxyada iyo weerarada kadib ayaa waxaa halkaasi soo gaadhay Ciidamo Kenyaan ah oo kasoo dhaqaajiyay Deegaanka Dhoobley, waxa ayna gurmad u fidiyeen Ciidamadii ku dhaawacmay weerarka iyo kuwii ku dhintay.
Dhanka kale, weerarkaani ayaa waxa uu daba socdaa weerar dhawaan ay Maleeshiyaadka ku qaaden Saldhigyo ay ku sugnaayen Cutubyo kale oo ka tirsanaa Ciidamada Kenya ee ku sugan xuduudka.
SDN/QJ
Contact@somalidiasporanews.com