Ethiopia Oo Sheegtay In ay gacanta ku dhigtay Rag ka tirsan Al Shabaab oo Afduub ka geysan rabay dalkaasi

Addis Ababa March 25 2013 (SDN)– Laanta Sirdoonka Ethiopia ayaa sheegtay in ay gacanta ku dhigtay 8-ruux oo ka tirsan Al Shabaabka Soomaaliya kuwaasi oo ay ku eedeeysay in ay maleegayeen Afduub ay u geystaan Shaqaalaha qaramada Midoobay ee ku sugan dhulka ay ka taliso.

NISS-ta Ethiopia ayaa tilmaamtay in kooxdan ay qabteen ay doonayeen in ay afduubtaan Ajaanib u shaqeynasay Barnaamijka Cunada Aduunka (WFP), Barnaamijka Hormarinta Qaramada Midoobay, waxaana ay intasi ku dartay in ay doonayeen in ay u qaataan Soomaaliya islamarkaana ay madax furasho ka dalbadaan.

Warasaxaafadeed Laanta Sirdoonka Ethiopia ay soo saartay ayaa lagu xaqiijiyay in 8-daasi ruux ay ku jiraan gacanta Ciidamada Ethiopia islamarkaana talaabo laga qaadi doono.

Saraakiil Ethiopian ah ayaa u sheegay wakaalada Wararka baahisa ee Reuters in kooxaha laqabtay ay afduubka ka geysan rabeen Xirada ay qaxootiga Soomaalida ku jiraan ee ku taala Dolow Cade halkaasi oo ay gaaraan shaqaalaha Q       aramada Midoobay ka socda.

Hadalka ka soo baxay Laanta Sirdoonka Ethiopia ayaa imaanaya Labo bil kaddib markii mas’uuliyiinta wadankaasi ay xireen 15-ruux oo lagu tuhmayo in ay ku soo tababarteen xeryo ay Al Shabaab leeyihiin.

SDN-Addis Ababa