Banaabax looga soo horjeedo Madaxweyne Faroole oo ka socda Magaalad Galkacyo

Gaalkacyo Dec 24 2012 (SDN)— Wararka ka imaanaya Magaalada Gaalkacyo qeybta Puntland ayaa waxa ay sheegayaan in halkaasi uu ka socdo banaanbax ballaaran oo looga soo horjeedo Madaxweynaha maamulka Puntland.

Banaanbaxa oo ay dhigayaan qaar kamid ah shacabka ku nool Magaalada Gaalkacyo qeybteeda Puntland ayaa waxaa lagu muujinaya sida looga xun yahay xariga iyo mudo kororsiga Faroole.

Dadweyne badan oo aad ucadheysan ayaa lasoo wariyay inay socod ku tageen xarunta Gobalka ee maamulka Puntland Magaalada Gaalkacyo halkaasi oo ay taayaro ku horgubeen.

Shacabka Banaanbaxa dhigaya ayaa waxa ay ku dhawaaqayaan erayo ay kamid yihiin “dooni meyno caburinta Faroole dooni meyno mudo kororsiga Faroole” iyo ereyo kale.

Masuuliyinta maamulka Puntland ee Waqooyiga Gaalkacyo ilaa iyo iminka kama aysan hadlin banaanbaxa ka dhacay Magaalada Gaalkacyo ee Faroole looga soo horjeedo.

Banaanbaxa maanta ka socda magaalada Gaalkacyo ee xarunta Gobalka Mudug ayaa wuxuu kusoo aadaya iyadoo habeen kahor Magaalada Garoowe lagu xiray nabadoono kasoo jeeda Gobalka Mudug iyo Bari.

Galkacyo-SDN