Pakistan: Qarax ismiidaamin ah oo galaaftay nolosha 16 qof

Peshawar 13, October 2012 (SDN)- Qarax uu qof ismiidaamiye ahi u adeegsaday baabuurkiisii, ayaa 16 qof ku dilay gobolka Khyber-Pakhtunkhwa ee dhinaca Waqooyi-galbeed ee dalka Pakistan.

Siday sheegeen masuuliyiinta dawladda Pakistan, qaraxan oo Sabtida maanta dhacay waxa uu sidoo kale sababay dhaawaca 15 qof oo kale, sida sheegay sarkaal sare oo ka tirsan dawladda Baakistaan.

Qaraxu waxa uu ka dhacay meel suuq ah oo lagu badan yahay, kuna yaala magaalada Darra Adam Khel, oo ku taala Koonfurta magaalo-madaxda gobolkaas ee Peshawar.

Ilaa hadda ma jirto cid sheegatay qaraxaas oo badi dadka ku dhintay ay ka soo jeedaan bulsho-qabiileedka deegaankaas.

Qurbejoog.com, Peshawar