Dagaal Beeleed ka Qaraxay Xarfo

Xarfo (QJ) – Ugu yaraan laba qof ayaa ku dhintay tiro kalena waa ay ku dhaawacmeen dagaal beeleed ka dhacay degmada Xarfo ee gobolka Mudug. Xiisadan oo salka ku haysa muran dhul iyo ceelal ayaa saameyn xooggan ku yeeshay deegaanka, iyadoo shalay la gubay ceel muhiim ah oo magaalada ku yaallay, sida ay sheegeen goobjoogayaal.

Khasaaraha ka dhashay dagaalka ayaa sii kordhay, iyadoo labada dhinac uu soo kala gaaray dhimasho iyo dhaawac, iyadoo xaaladdu ay tahay mid aan la saadaalin karin. Ilaa iyo hadda ma jirto cid si toos ah u kala dhexgashay labada dhinac, taasoo keentay cabsida laga qabo in colaadda ay sii xoogeysato.

Waxgaradka labada dhinac iyo maamulka Puntland ayaan weli wax war ah ka soo saarin colaadaasi, taasoo muujineysa in aan xal degdeg ah laga gaarin.

Colaadaha noocaan oo kale ah ayaa inta badan ku soo noq-noqda dhulka miyiga ah ee dhul daaqsimeedka ay isku dhafan, taasoo xalinta xiisadahaas ka dhiga mid aad u adag.