NISA oo qabqabtay dhalimyaro Al Shabaab rabay in ay ku biiraan

Mogadishu November 07, 2023 (QJ) -Hay’adda Nabad Suggida & Sirdoonka Qaranka (NISA) ayaa ka warbixisay hawlgal ballaaran oo ciidamada ammaanka ay maanta ka sameeyeen Degmada Afgooye ee Gobolka Shabeellaha Hoose.

NISA ayaa xaqiijisay in howlgal qorsheysan lagu soo qabtay ilaa 28 ruux oo 25 ka mid ah ay sheegeen in ay damacsanaayeen ka mid noqdaan Al-Shabaab.

Hay’adda ayaa shaaca ka qaaday in shaqsiyaadka la qabtay ay ku jiraan wiilal da’yar, islamarkaana loo diyaarinayay ku biirista Al-Shabaab.

Dhammaan shaqsiyaadka la soo qabtay ayaa hadda ku jira gacanta NISA, waxaana ku socda baaritaanno ay wadaan laamaha ammaanka.

Maalmihii u dambeeyay ciidamada dowladda Soomaaliya ayaa kordhiyay howlgallada ay ka sameynayaan magaalada caasimadda ah iyo nawaaxigeeda, si ammaanka loo xaqiijiyo.