Markab Boqol Sano ka Hor ka Qaraqmay Ciidamada Bada ee Maraykanka oo Iminka Warkiisa la helay

Washington 21. June 2017 (SDN/QJ):- Cilmibaadhayaal muddo raadinayey Markab la waayey boqol sano ka hor oo ay lahaan jireen ciidamada badda ee Maraykanka ayaa ugu dambayntii burburkiisa helay.

Masuuliyiin ka tirsan gaashaandhigga Maraykanka ayaa sheegay in markabkan dagaal uu shiraacday xilligii uu socday dagaalkii dhex maray Isbayn iyo Maraykanka, laakiin uu ku qarqoomay meel ku dhow xeebaha Kalafoorniyada Koonfureed (California) muddo hadda laga joogo boqol sano.

 

Markabkan hadhaagiisa ayaa marka la soo wada saaro ayaa saldhiggii uu ka tirsanaa oo ahaa magaalada San Francisco ee gobalka California waxaa loogu qaban doonaa munaasabad ballaadhan oo lagu xuso markabka iyo hawlwadeennadii saarnaa oo ay ka mid ahaayeen laba qof oo iyagu ku dhintay intii ay ku gudo jireen shaqada qaranka.

Warkan oo uu Wargayska Geeska Afrika Afsoomaali u rogay ayaa shabakadda wararka ee Sky News ay ku sheegtay in markabkan oo lagu magacaabi jiray McCulloch uu ku jihaysnaa gacanka Manila xilli uu dagaal adag labada dhinac u dhexeeyey.

 

Markabka McCulloch waxa uu degey Saddex iyo Tobankii bishii Lixaad ee sannadkii 1917-kii,  waxa aanu ku degey meel Shan Kiiloomitir oo keliya dhinaca woqooyi-galbeed ka xigta xeebta badweynta Baasifigga oo lagu magacaabo Point Conception, gobalka California, laakiin markiiba lama helin burburkii markabka qaybo badan oo ka mid ah.