Guddoomiyaha KULMIYE iyo Xukuumadda Somaliland oo Gargaar Lacageed Iyo Daawooyin Gaadhsiiyey Magaaladda Burco SAWIRO
Guddoomiyaha KULMIYE, ahna murrashaxa Madaxweynaha xisbiga Md. Muuse Biixi Cabdi oo isaga iyo wefti uu hoggaaminayaa ku sugan yihiin magaalada Burco, ayaa taakulo lacageed oo qadarkeedu dhan yahay $70,000 (toddobaatan kun oo dollar) ah ku wareejiyey madaxda Wasaaradda Caafimaadka, iyadoo xukuumadduna 270 kartoon oo dawo kayd ah wareejisay si ay qayb uga noqoto gurmadka xakamaynta xannuunka Shuban-biyoodka.
Guddoomiye Muuse Biixi oo isaga weftigiisa oo ay ka mid yihiin wasiirro xukuumadda ka tirsan, ayaa maanta booqday dhawr goobood oo ay ka mid yihiin Cusbitaalka guud ee magaalada Burco iyo Xabsiga magaalada Burco iyo goobta uu ka socdo dhismah Xabsiga cusub ee Burco, kuwaas oo ay warbixinno kaga dhegaysteen madaxda maamusha.
Murrashaxa Madaxweynaha KULMIYE Md. Muuse Biixi Cabdi iyo masuuliyiinta wehelinaysa oo booqday Cusbitaalka Guud ee Burco waxa khudbada uu halkaasi ka jeediyey kaga dhawaaqay in xisbiga KULMIYE ee haya talada dalka iyo xukuumaddiisu ay awoodooda oo dhan isugu gaynayaan la-dagaalanka cudurka Shuban-biyoodka, isla markaana waxa uu ku wareejiyey Wasiirka Caafimaadka taakulo lacageed oo dhan toddobaatan kun oo dollar $70.000 ay ugu talogaeen gurmadka xannuunkan.
“Halkan annagu xisbi ahaan tabaruc baanu keenay ah qaadhaan ay soo ururiyeen dad KULMIYE ka mid ah iyo taageerayaashiisa oo shanta qaaradoodba iyo gudahaba ka kooban oo ashkhas iyo ururraba leh, lacag ay soo ururiyeen baanu u sidnaa halkan oo lagu taageerayo gurmadka loogu jiro la-dagaalanka Shuban-biyoodka Burco, markaa maanta waxaan ku wareejinaynaa Wasiirka Caafimaadka jeeg ah $70,000 (toddobaatan kun oo dollar ah,” ayuu yidhi Md. Muuse Biixi.
Sidoo kale, Wasiirka Madaxtooyada Md. Maxamuud Xaashi Cabdi, ayaa isaguna madasha ku wareejiyey 270 kartoon oo daawooyin ay bixisay xukuumaddu oo ay ugu talogasheen talogashay inay kayd u noqoto dadaalka lagula tacaalayo xannuunka Shuban-biyoodka, waxaannu yidhi “Waanu bogaadinayaa xisbiga KULMIYE qaadhaankan uu ku wereejiyey Wasaaradda Caafimaadka lacagtaa waxa lagu isticimaali doonaa gunnooyinka hawl-wadeena shaqaynaya habeen iyo maalinba ayaa loo adeegsanyaa, laba bilood masaaniyadood ayey soo gudbiyeen, kharashkaas ayaa ka daboolaya hawshan, waanu ku bogaadinayaa xisbiga KULMIYE iyo Guddoomiye Muuse Biixi. Waxa kale oo aannu halkan Wasaarada Caafimaadka kaga wareejinayaa 270 kortoon oo dawo iyo qalab ka kooban oo aannu xukuumad ahaan gobolkan aannu u keenay si aanu xaaladda gurmadkan ay qayb ugu noqoto.”
Wasiirka Wasaaradda Caafimaadka Somaliland Dr. Saleebaan Xaglo-toosiye, ayaa sheegay inay ka wasaarad ahaan gurmad xoog leh ka galeen sidii aannu xannuunku u faafi lahayn, waxaannu si wayn ugu bogaadiyay xisbiga KULMIYE iyo xukuumadda ka qayb qaadashada gurmadka la-dagaalanka Shuban-biyoodka ee Burco.
Dhinaca kale, Madaxda KULMIYE iyo xukuumadda oo kormeeray Xabsiga Burco oo ay ku jiraan maxaabiis koobani iyo dhismaha xabsi cusub oo la dhisayo, ayaa warbixin ay ka dhegaysteen Taliyaha Xabsiga waxa uu sheegay in maxaabiistii uu soo ritay cudurka Shuban-biyoodku ay intoodii badnayd ka kaceen xannuunkaasi marka laga reebo 11 maxbuus oo ay weli daawayntu u socoto.
Wasiirka Wasaaradda Madaxtooyada oo ka mid ah Weftiga ayaa sheegay inay xukuumadda ahaan ay dhamaystirayaan xabsiga cusub ee Burco oo lagu talogalay inuu qaado maxaabiis tiro badan waxaanu yidhi, “Mashruucan xabisga dhaxe ee magaalda Burco oo ah halkan waxa ku baxaya Hal milyan iyo shan boqol oo kun oo doolar ($1, 500, 000), xukuumadda Somaliland ayaa fulinaysa, lacagtaa qayb ayaa la bixiyey, qaybta kalena hadda waa la bixinayaa, shirkaddiina gacanta ayey ku haysaa, ma jiro jeel istaagay, waxaannu beeninaynaa in dhisme istaagay uu jiro, waxaan u mahadcelinayaa shirkada Al-Baraka oo runtii xoog saartay, waa shirkad caan ku ah dhismayaasha, waana kaa socda. Waxaan maqlayey iyadoo la leeyahay jeelkii wuu istaagay, xukuumadda Madaxweyne Axmed Siilaanyo meelna dhagax ma dhigo, haddaanu dhignana waanu dhisnaa.”
Wasiirka Wasaaradda Maaliyada Marwo Samsam Cabdi Aadan, ayaa waxba kama jiraan ku tilmaantay warar sheegaya inuu hakaday dhismaha xabsiga cusub ee Burco, iyada oo sheegtay inay Wasaaradda Maaliyaddu diyaarisay lacagta ku baxaysa dhismaha Xabsiga.
