Dawlada Waddanka Kuwait Oo Qabatay Shimbir Xambaarsan Maandooriye !!

Kuwait 26. May 2017 (SDN/QJ):- Dhacdo aad u layaab badan oo aan nooceeda oo kale hore loogu adeegsan Tahriibinta iyo Iib geynta Maandooriyaha ayaa waxay ka dhacday Dalkaasi Kuwait.

Dhacdadan ayaa ka dhacday xudduuda u dhexaysa labada Dal ee Ciraaq iyo Kuwait gaar ahaan goobta Cashuuraha ee loo yaqaan Al-cabdali waxaanay Shaqaalaha ka hawlgala goobtaasi daba galeen shimbir markii hore uu Nin sitay oo ka baxsaday isla markaasina dul istaagay mid ka mid ah giddaarada Dhismaha hay’adda Cashuuraha ee Dalkaasi Kuwait.

 

Shimbirkaasi waxa dabagalay ciidammada Ammaanka ee goobtaasi ku sugnaa siday soo bandhigtay Jarriidada Al-Rai ee ka soo baxda Dalkaasi Kuwait oo Wargeyska Himilo kasoo xigtay, intaasi kadib markii la soo qabtay Shimbirkaasi ee la baadhay waxa caddaatay in inta la jeexay lagu soo dhex riday 178 xabo oo Maandooriye ah, waxaanay arrintaasi noqotay mid ka yaabisay Shaqaalihii ku sugnaa goobtaasi ilaa iyo haatana waxa la baadhayaa ciddii lahayd ee wadatay Shimbirkan.