Qiimaha Tikidhada Final-ka Champion-ka Yurub oo Cirka isku Shareeray

London 15. May 2017 (SDN/QJ):- Xidhiidhka kubadda cagta ee Qaaradda yurub ayaa u gaar yeelay illaa 18 kun oo tikidh taageerayaasha Kooxaha Real Madrid iyo Juventus oo iskaga hor imanaya Ciyaarta Finel-ka ee tartanka kooxaha horyaalada Qaaradda Yurub oo bishan soo socoto bilowgeeda ka qabsoomi doona Garoon ku yaalla Magaalada Cardief ee Gobolka Wales ee Dalka Britain.

Wargayska ‘Marca’ ee Dalka Spain ayaa xusay in tikidhka ciyaartaasi uu suuqyada xiligan ka marayo illaa 500 lacagta Euro-da ah, iyadoo Magaalada Cardief ay leedahay labo garoomada Diyaaradaha ah sidaa darteed-na labada kooxood ay mid waliba isticmaali doonto garoon gaar ah si looga fogaado isku dhac ku yimaadda taageerayaasha labada kooxood.

Kooxda Real Madrid ee Dalka Spain ayaa gaadhay Ciyaarta kama dambaysta ah sanadkii labaad ee xidhiidh ah, ka dib markii ay labadii ciyaarood ee Semi Finalka isugayn kaga badiyey 4-2 kooxda ay cadaawadu ka dhexayso ee ay isku Magaalada yihiin ee Athletico madrid, xilli ay Kooxda kale ee Juventus iyana ay 4-1 kaga soo tallaabsatay kooxda Monaco ee Dalka Faransiiska.