Hindiya: Haween Booliis Ah Oo Shaqadii Lagaga Eryey Fal Ay Sameeyeen

Delhi 03. April 2017 (SDN/QJ):- Saddex haween booliis ah oo ilaalinayey haweenay weerar ay u geysteen laba nin ayaa shaqadii laga eryey, ka dib markii ay muuqaal iskaga horqaadeen haweenaydii ay ilaalinayeen oo sariir jiifta.

Taliska Booliiska gobolka UP ee Hindiya, ayaa shaqadii ka saaray saddexdii haween ee booliiska ahaa, isla markaana amray baadhitaan lagu sameeyo.

sarkaal booliiska ah Satish Ganesh ayaa ku tilmaamay falkii saddexda haween sameeyeen mid aan loo dulqaadan Karin, isla markaana tallaabo degdeg ah laga qaadi doono.

Badhasaabka gobolka UP Mr. Yogi Adityanath oo booqasho ku tegay cusbitaalka haweenaydii lagu weeraray asiidh ayaa amray in la soo xidho ragga ka dambeeyey, oo saacado ka dib xabsiga la dhigay.

Badhasaab Yogi Adityanath oo xisbiga BJP ka soo baxay ayaa ololahii doorashada tilmaamay inuu la dagaalami doono dembiyada loo geysto dumarka.