Dalalka Jarmalka Iyo Ingiriiska Oo Lacago Cadad-badan Ugu Deeqay Dadka Ay Abaaruhu Ku Habsadeen Ee Somaliland, Ka Dib Kullamadii Ay Saraakiisha Xisbiga WADDANI Kula Yeesheen KENYA
Nairobi 17. December 2016 (SDN/QJ):-Duwalkii Caalamka ee Madaxda XISBIGA WADDANI kulamada is dabajooga ah kula qaateen dalka Kenya oo durba ka soo jawaabay dalabyadii Xisbigu u bandhigay ee ay ugu tunka weynayd asmada ka dhalatay abaarta baahdan ee ku dhufatay Gobolada SOMALILAND.
7,000,000 £ Todoba Million Oo Lacagta Giniga Ingiriiska ah waxa Ku yaboohday Dawladda UK .
Halka 5,000,000 & Shan Million oo Dollar ay Ku deeqaday Dawladda GERMANY .
Mar dhawayd waxaa soo xidhmay shir ay isugu yimaadeen dhammaan safaaradihii aanu kulamada la yeelanay ee kala aha dalalka, USA UK, France, GERMANY DENMARK UNITED NATION , EUROPE iyo IGAD waxaana loo qabtay shirkan abaaraha SOMALILAND
Shirkan deg dega ah waxa lagu go’aamiyay in wafdi dag dag ah loo diro dalka SOMALILAND muddo laba cisho gudahood ah, wafdigaas oo ugu horreyn ka degi doona magaalada Hargaysa ee Caasimadda dalka .
Lacagta kor ku xusan waxa ku deeqay dalka U.K. Iyo GERMANY dhammaan dawaladaha kalena balan qaadyo deg deg ah ayay soo wadaan.
Wafdiga XISBIGA WADDANI ee ku sugan Nairobi waxay ugu baaqayaan Xukuumadda iyo Xisbiga KULMIYE in aanay ka hinaasin dedaalka Xisbiga WADDANI ugu jiro dalkiisa iyo dadkiisa abaaruhu aafeeyeen, ayna soo dhaweeyaan wafdiga miisanka leh ee ku soo aadan dalka waayo dhammaanteen waxaynu u shaqaynaynaa shacbigeena oo u baahan in midnimo loogu adeego.
WADDANI waxa mar walba kaalinta koobaad u ah badbaadinta dalka,Sidaa Waxaa Lagu Sheegay Qoraal ka soo Baxay Waaxda Warfaafinta ee Xisbiga Waddani.