Qarax Xoogan oo Goor dhawayd ka Dhacay Maqaaxi ka Soo Hor Jeeda Tiyaatarka Magaalada Muqdisho

Muqdisho 15. December 2016 (SDN/QJ):- Qarax xooggan oo ismiidaamin ah, ayaa goor-dhow ka dhacay magaalada Muqdishu, ee caasimda dalka Somalia.

Weerarka oo ahaa mid loo adeegsaday Gari walxaha qarxa lagu soo xiray, ayaa  ka dhacay Maqaaxida The Village, oo ku taalla kasoo horjeedka Tiyaatarka Qaranka.

Warar kala duwan ayaa kasoo baxaya sida wax u dhaceen, waxaan goob joogayaal ku sugnaa nawaaxiga meheradda warbaahinta u sheegeen in gaarigu Qarxay isagoo lamiga maraya, halka kuwo kale Ku warameen inuu qalibmay dabadeedna qaraxu yimid.

Lama oga khasaaraha weerarkaasi ka dhashay, inkastoo la sheegay inuu dab qabsaday qayb kamid ah meheradda The Village.

Goobjooge ayaa Warbaahinta u sheegay in ugu yaraan Hal ruux uu ku dhintay Qaraxa, sidoo kalena ay ku dhaawacmeen dad kale oo Wariyaal ay kamid yihiin.