Muqdisho: Abwaan SANGUB Oo Xaalad Caafimaad-daro Loo Dhigay Cusbitaal Ku Yaalla Muqdisho DAAWO

Muqdisho 07.October 2016 (SDN/QJ):- Waxa Cisbitaal ku yaalla Magaalada Muqdisho la dhigay Abwaanka Caanka ah ee Maxamuud Cabdillaahi Ciise (Sangub) oo sidoo kale ah Guddoomiyaha Golaha Abwaannada Soomaaliya.
Abwaan Sangub, ayaa la dhigay Cisbitaalka Erdogan (Ex Digfeer) ee Magaalada Muqdisho, ka dib markii ay la soo deristay Xaalad Caafimaad-daro oo ka dhalatay Xanuunnada Macaanka Iyo Dhiig-karka oo Abwaanku hore ula noolaa, sida ay Radio KULMIYE oo laga dhegaysto Muqdisho ku baahisay boggeeda Internet-ka.

Idaacadda ayaa sheegtay in Xaaladda Caafimaad ee Abwaanku sii cuslaatay, ka dib markii lagu sameeyay Qalliin, wallow aanay xusin waxa laga qalay iyo halka laga qalliinka lagaga sameeyay Midna.

Abwaanka oo ay Shalay Cisbitaalka ku booqdeen Abwaanno iyo Weriyeyaal, ayaa la gaadhsiiyey lacag dhan $ 1.500 oo dollar oo sida la sheegay ay ugu tabaruceen Wasiirka Arrimaha gudaha Soomaaliya Cabdiraxmaan Maxamed Xuseen Odowaa, Cabdi Tahliil Warsame iyo Abwaanno ku nool Magaalada Muqdisho.