Madaxweyne SIILAANYO Oo Khudbad 40-ilbidhiqsi Ah Ka Jeediyay Xafladdii 18-May Ee Madaxtooyada

Hargeysa,19,5,2016 (QJ/SDN) – Madaxweynaha Somaliland mudane Axmed Maxamed Maxamuud [Siilaanyo] ayaa khudbad aad u gaaban ka jeediyay xaflad ka dhacday caawa qasriga Madaxtooyada, taasi oo loogu dabbaal-deggaayay munaasibadda 18-May.

Madaxweynaha ayaa khubaddiisa hambalyo ugu diray dhammaan shacabka Somaliland munaasibadda 18-May awgeed, isagoona shacabka Alle uga baryay in uu sanadka xiga ku gaadhsiiyo bash-bash iyo barwaaqo.

Mudane Siilaanyo oo Khubaddiisu ay ka koobnayd 40-ilbidhiqsi ayaa yidhi; ”Bismillaahi Raxmaani Raxiim Alxamdulillaahi Rabbil caalamiin Wassalaatu wassalaamu calaa rasuulillaah. Caawa waxaan joognaa xafladdii dabbaal-dega 18-May, waa maalintii 25 sanno ka hor aynu lasoo noqonay madax-banaanideenii, waxaan hambalyo iyo bogaadin u dirayaa shacbi waynaha Somaliland meel ay joogaanba, waxaan xafladda kusoo dhaweynayaa madaxda qaranka, diblumaasiyiinta iyo marti-sharafta innooga yimi waddamada aynu saaxiibka nahay, Illaahay waxaan ka baryayaa in sanadka kale inagu gaadhsiiyo bash-bash iyo barwaaqo.. Aammiin Aammiin. Wasalaamu Caleykum waraxmatullaahi wabarakaatuh’’.

Khudbadda caawa uu madaxweyne Siilaanyo ka jeediyay qasriga madaxtooyada ayaa noqon doonta tii ugu danbeysay ee uu shacabkiisa u jeediyo muddada uu xilka hayo, maadaama muddo xileedkiisu uu ku eegyahay horraanta sannadka soo socda.

Si kastaba ha ahaatee, 25-sanno ayaa kasoo wareegatay markii ay Somaliland ku dhawaaqday in ay ka go’day Soomaaliya inteeda kale, iyadoona wixii intaas ka danbeeyay ay Jamhuuriyaddu ku tallaabsatay horumarro kala duwan.