Madaxweynaha Jubbaland Axmed Madoobe Oo Markii Ugu Horreysay Gaadhay Magaalada Cadaado SAWIRRO

Cadaado,6jan,2016(QJ/SDN)-Waxaa maanta Magaalada Cadaado ee xarunta KMG ee Maamulka Galmudug gaadhay si qurux badana loogu soo dhaweeyay Madaxweynaha Maamulka Jubbaland Sheekh Axmed Maxamed Islaam (Axmed Madoobe) .

Madaxweynaha Galmudug Cabdi Kariin Xuseen Guuleed , Madax kale oo katirsan Maamulka Galmudug iyo qeybaha kala duwan ee bulshada ku dhaqan Magaalada Cadaado ayaa garoonka iyaaradaha uga hortagay si diirana ugu soo dhaweeyay Wafdiga uu hogaaminayay Sheekh Axmed Madoobe.

Wafdiga Madaxweynaha Jubbaland ayaa loo galbiyay xarunta Madaxtooyada Galmudug ,halkaas oo qado iyo soo dhaweyn heer sare ah loogu sameeyay, waxaana xaruntaasi kulan ku yeeshay Madaxda Maamulada Galmudug iyo Jubbaland.

Socdaalka uu maanta ku tagay Magaalada Cadaado Madaxweyaha Jubbaland ayaa noqonaya kii ugu horeeyay uu halkaasi ku tago isaga oo Madaxweyne ah , Sheekh Axmed Madoobe ayaa horey uga mid ahaa dadka kasoo horjeeday Dhismaha Maamulka Galmudug .