Ra’iisal Wasaaraha Soomaaliya Oo La Filayo In Uu Booqdo Magaalada Gaalkacyo iyo Xiisad Colaadeed Oo Halkaasi Ka Taaqan

Gaalkacyo,26Nov,2015(QJ/SDN)-Saacadaha soo socda waxaa Gaalkacyo kusoo wajahan Wafti uu hogaaminayo Ra’iisul wasaaraha dowladda Fadaraalka Soomaaliya Cumar Cabdirashiid Cali Sharma’ake.

Cumar Cabdirashiid ayaa Gaalkacyo u imaanaya sidii loo xalin lahaa xaalada kataagan,Saaka waxaa lagu waday magaaalada inuu ka furmo shir u dhaxeeya labada dhinac,walow wararku sheegayaan in shirkaasi uu baaqday oo ay imaan waayeen Odayaashii dhanka Galmudug.

Magaalada Gaalkacyo waxaa ilaa shalay ka socday barakac labada dhinac ah,iyagoo shacabku ay ka Cabsi qabaan inuu dagaal dhaco, kadib markii labada maamul magaalada keeneen Ciidan iyo hub.

Sida wararku sheegayaan Puntland ayaa ku adkaysatay inay dhisato wadada rabshadu ka bilaamatay oo ku taal xaafada Garsoor, Galmudug ayaa sheegtay in Puntland ay ku wareejiso Suuq ku yaal xaafatul Carab oo xadka labada maamul ah si ay Puntland wadad udhisto wararka ayaana tibaaxaya in Puntland arinkaa diiday.

Si kastaba ha ahaatee, dhawaan ayaya ahayd markii magaalada Gaalkacyo ay ku wada dagaallameen ciidamada maamulada Puntland iyo Galmudug halkaas oo uu ka dhashay khasaare dhimasho iyo dhaawac iskugu jira.