Uganda: Alshabaab oo laga cabsi qabo inay weerar la beegsadaan Boobka Diinta Masiixiga.

Kampala,13Nov,2015(QJ/SDN)-Afhayeenka Milliteriga Uganda, Kolonel Paddy Ankunda ayaa sheegay in heegan la geliyey in ka badan 10,000 oo Saraakiil Bolis oo ay Milliterigu taageerayaan, si ay u sugaan booqashadda uu Boobka ugu weyn Diinta Kirishtaanka, Pope Francis dabayaaqadda bishan ku tegayo Uganda.

Paddy Ankunda waxa uu sheegay inay jirto cabsi ku aadan Weeraro ay Alshabaab ka geysan karaan Uganda, iyadoo laga tusaale qaadanayo qaraxyaddii ay Alshabaab ka geysteen Kampala sannadkii 2010-kii, laguna dilay 76-qof.

Dhinaca kale, Afhayeenka Boliska Uganda, Fred Enanga ayaa u sheegay Wakaalladda Wararka AFP inay had iyo jeer cabsida ka timaado Dagaalamayaasha Alshabaab.

Waxa uu xusay in 10,200 oo Saraakiil ah loo daad-gureeyey Ilaalinta Ammaanka Pope Francis oo uu xusay inuu yahay nin Shacbiyad badan ku dhex leh Uganda.

Baadariga ayaa  la filayaa inuu dabayaaqadda bishan booqasho ku soo kala bixin doonaa dalalka Uganda, Kenya iyo Kongada Dimuqraadiga.

Dhinaca kale, Kenya ayaa adkaynayso Ammaanka, si aanay Dagalaamayaasha Alshabaab u geysanin weeraro xilliga uu Boobka Masiixiga uu booqan doono Kenya.

Dowladda Maraykanka ayaa uga digtay Muwaadiniintooda inaysan booqanin Kenya, cabsi laga qabo inay Alshabaab geystaan weeraro iyo Isqarxin loo adeegsan karo gaadiid laga soo buuxiyey waxyaabaha qarxa.